Oiartzungo Elizalde Herri Eskolako gurasoek eta Errenteria-Oreretako ikastetxeetakoek antolatu dute festa
Bizikletan joango direnei festaren logoa dortsal moduan eramateko eskatu diete.
Datorren urteko ekainaren 2an Euskal Eskola Publikoaren festa ospatuko dute Errenteria-Oreretan,
Makina bat taupada lelopean. Herriko hiru ikastetxe publikoetako (Bizarain, Gamon eta Koldo Mitxelena) gurasoak buru belarri ari dira egun hori prestatzen. Hala ere, festa hori eskualde osoko ikastetxe publikoena izatea nahi dute. Motorrak berotzen joateko asmoz, bertako hezkuntza komunitateak topaketa batera gonbidatu dituzte, Oiartzunen.
Datorren igandean, hilak 21, egingo dute topaketa hori. Helburua eskualdeko ikastetxeak elkartzea da, eskola publikoaren eredua indartzea eta behar duen babesa eskatzea. Horregatik, ikastetxe publiko guztietako kideak gonbidatu dituzte.
Errenteria-Oreretan jarri dute lehen zita, bizikletan Oiartzunera joateko. 09:30ean gelditu dira, eta Oiartzunera abiatuko dira. Han, Elizalde Herri Eskolakoek harrera egingo diete, eta gerorako ekitaldi sorta polita egingo dute. Honakoa izango da egitarau osoa:
- 09:30ean: Errenteria-Oreretan bilduko dira, Zumardian, bidegorritik Oiartzungo Elizalde Herri Eskolara bizikletan joateko.
- 10:30ean: Harrera eta hamaiketakoa.
- 11:15ean: Herrian barrena desfilea, Done Eztebe plazaraino, eskualdeko eskoletan sortutako buruhandiekin eta musikariekin batera.
- 12:00etan: Txupinazoa, txalaparta, agurra, aurkezpena eta bertsoak izango dira plazan. Txupinazoaren ondoren, berriz eskolara itzuliko dira kalejiran.
- 13:15ean: Norberak eramandakoarekin bazkaria. Jarraian hainbat jarduera izango dira: mural margoketa, aurpegi margoketa eta herri kirol nahiz jolasak.
- 16:00etan: Errenteria-Oreretarantz buelta.