Donibaneko ura edangarria da berriz ere
Osasun Sailak baimena eman du udal saretik edan ahal izateko
Donibaneko bizilagunek iturriko ura edan dezakete berriz ere. Hala iragarri du udalak, bando bidez, halakoetan derrigorrezkoak diren analitika guztiak gainditu ondoren.
Lehengo ostegunean hasi zen arazoa, udalak orain jakinarazi duenez, Jaizkibelgo “depositua garbitzeko lanek eta ur-zaparradek sorrarazitako urek bat egitean”. Uraren legezko uhertasun maila gainditzea ekarri zuen horrek, eta horregatik ezarri zuten gaur arte indarrean egon den ura kontsumitzeko debekua.
Halakoetan protokoloak hiru analitika agintzen ditu, 24 orduko tartearekin, eta horiek eginda ura kontsumorako ona dela baieztatu dute. Hala ere, ostiraletik egin diren analitika guztiek “kutsadura mikrobiologikoan, organikoan, mikrobiologikoan eta metaletan beti negatibo” eman dutela ohartarazi nahi izan du udalak, inork egun hauetan ura edan badu kezkatu beharrik ez duela baietsiz, “ura ez delako inongo momentuan izan osasunerako txarra”.
Edonola ere, barkamena eskatu du udalak, molestiengatik, eta arazo hau berriro gerta ez dadin lanean jarraituko dutela agindu dute.
