Kote Camachok Txillardegiri buruzko film laburra egin du
Zinema zuzendari oiartzuarrak Korrika 21eko omenduari buruzko film laburra osatu du, duela zazpi ekitaldiko elkarrizketan oinarrituta. Larunbatean ikus ahal izango da.
Korrika 21 iristeko bi hilabete inguru falta dira, eta AEK ari da motorrak berotzen. Aurtengo ekitaldiko omendua Jose Luis Alvarez Enparantza Txillardegi hizkuntzalaria zena izango da, euskara batuaren bultzatzaile nagusienetako bat. Hizkuntzaren estandarizazioaren oinarriak finkatu zirenetik 50 urte pasatu dira, eta data hori probestu nahi dute.
AEK-k, EHU eta Jakin aldizkariarekin batera, omenaldi ekitaldia antolatu du larunbat honetarako. Musikeneren egoitzan izango da omenaldia, 19:00etan hasita. Bertan, besteak beste, Txillardegiren klika film laburra ikusteko aukera egongo da. Kote Camacho oiartzuarrak egin du filma, Txillardegik berak Korrika 14rako eman zuen elkarrizketa batean oinarrituta. Harkaitz Cano eta Bernardo Atxagaren hitzak ere tartekatu dituzte bertan.
Larunbatean, ikus-entzunezkoaz gain, Txillardegik gogokoen zituen pianorako piezak joko dituzte, eta familiari oroitarria eskainiko diote.
Hemen behean ikus daiteke trailerra:
