'Cronopia' antzezlana ikusteko aukera egongo da igandean
Node Akziona! antzerki taldea gonbidatuko du Oiartzungo Antzerkizaleen Elkarteak. Hiru ezezagun, tren bat eta maleta bat dira antzezlanaren ardatza.
Igande arratsaldean izango da antzezlana. Oiartzungo Antzerkizaleen Elkarteak hilero prestatzen duen zita datorren igandean, hilak 17, izango da. Oraingoan, Node Akziona! antzerki taldea gonbidatu dute.
Anuxka Etxeberria, Ivan Aizpurua eta Jon Fernandez aktoreek ordubeteko saioa taularatuko dute udaletxeko pleno aretoan, 19:00etatik aurrera. Sarrerek, ohi bezala, bost euroko prezioa izango dute, eta egunean bertan erosi beharko dira.
Sinopsia
Cronopia-Dan Delantial geltokitik ateratzen den trena irtetear dago. Lekurik aproposena, dudarik gabe, bide desberdinak daramaten pertsonaiek topo egin dezaten. Tren honen konpartimentu bat, hain zuzen ere, gure protagonisten elkargunea izango da.
Hiru ezezagun, hiru istorio, hiru maleta eta tren bat. Iragana, ametsak eta sekretu ilun bat kaleratuko duen bidai bitxia. Zer gertatuko ote da?
Surrealismoa eta komedia beltza biltzen dituen antzerki eta ikus-entzunezko pieza dugu Cronopia-Dan Delantial. Bere bidezko neurrian eta zoroki nahasita, nola ez!
Igotzeko prest?
