Etxebizitza Bulegoak bederatzi etxebizitza merkaturatu ditu
Oiartzungo Udalak duela hiru urte jarri zuen martxan Etxebizitza Bulegoa, eta ordutik bederatzi etxemerkaturatu dira, alokairu duina helburu dutenak.
Badira hiru urte Oiartzungo Udalak Etxebizitza Bulegoa martxan jarri zuenetik. Oarsoaldea Garapen Agentziak ematen du zerbitzu hori, eta bederatzi etxebizitza merkaturatu dituzte, alokairu duin bat eskainiz, ASAP eta Bizigune programak baliatuta.
Kudeatzen dituzten datuen arabera, udalak esan du oiartzuarren artean alokairu eskaera dagoela. Hori bai, etxe hutsak behar direla, eta horregatik dei berezia egin diete etxe hutsen jabeei: “Etxebizitza Bulegora etortzea gonbidatu nahi ditugu, ASAP eta Bizigune programei buruz informatzera”.
Onurak etxejabeei
ASAP eta Bizigune programek abantailak eta bermeak ematen dizkiete etxejabeei. Udalak ere ematen dizkie laguntzak etxe hutsak alokairura bideratzen dituzten etxejabeei.
Adibidez, Higiezinen Gaineko Zergan %50eko deskontua egiten du, etxebizitza hutsik edukitzeagatik ordaindu beharko luketen %75 gehigarria beharrean. Gainera, udalak 60 euroko errenta osagarria ematen du 12 hilabetez eta Efizientzia Energetikoaren Ziurtagiria lortzeko laguntza (100 eurora arte).
Horrez gain, obren lizentzian %95eko hobaria eta berritzeko proiektuaren finantzaketa (3.000 eurora arte), gutxienez programan 3 urtez egoteko konpromisoaren truke (bost urteko konpromisoa udalaren berritzeko laguntzak jasotzen dituztenen kasuan).
Bi programa horietan parte hartzen dutenei, gainera, Jaurlaritzak aseguru hirukoitza eskaintzen due: ordainketa ezak, hondamenak eta asistentzia juridikorako aseguruan polizak.
Guztiaren berri izateko Etxebizitza Bulegotik pasa daiteke, Mamut merkatalguneko bulegoetako bigarren solairuan. E-posta bidez edo telefono bitartez jar daiteke harremanetan.
