Inoiz baino txirrindulari gehiagorekin eta babesle berriekin dator OTXE
2019 denboraldiko taldeak aurkeztu dituzte, baita babesle berriak ere. Helduagoen taldeak Urkia-AD Amets Tailerra izena eramango du.
Talde guztien familia argazkia, mokadutxoa jan aurretik. Bederatzi egun besterik ez dira falta Omloop het Nieuwsblad lasterketarako. Ziklismoaren zale puristenentzat hori da denboraldiari hasiera benetan ematen dion lasterketa, Flandriako harbideetan zehar.
Hori txirrindulari profesionalei dagokionez. Bertara iristeko, baina, formazioa beharrezkoa da, eta horretan ari Oarsoaldea Txirrindularitza Eskola (OTXE). Orain dela bost urte sortu zen, eskualdeko lau udalen bultzadari esker, eta ibilbide honen ondoren, talde handi bilakatu da. Atzo aurkeztu zituzten, ekitaldi xume zein prestatu batean, denboraldian zehar errepidetan zein mendi pistetan izango diren taldeak. Oiartzungo udaletxean izan zen aurkezpena, eta jende mordoxka bildu zen.
Mikel Astarloza txirrindulari ohiak egin zituen aurkezpen lanak. Azaldu zuenez, 10 eta 14 urte bitarteko 23 txirrindulari ditu OTXEk, 11 Kimu Mailan eta 12 Haur Mailan. Beren maillot koloreak berdea izaten jarraituko du, Oarsoaldeko kolore bera.
Iazko lorpenei errepaso bat eman zien: mendiko bizikletako Gipuzkoako txapelketak, nesketan zein mutiletan; Euskadiko Txapelketako hirugarren postua… Trialeko modalitatean ere San Markoseko proba irabazi eta beste 3 podium ere lortu dituzte.
Lezoko Garbiñe arrandegiak eta Errenteria-Oreretako Launa SLk babestuko dute eskola. Hemen sakatuta ikus daitezke taldeak.
Babesle aldaketa
Helduagoen taldeek babesle berriak izango dituzte aurten. Ciclos Iñaki ordeztuko dute Urkiak eta AD Amets tailerra enpresek. Errenteria-Oreretako dendak, baina, materiala ematen jarraituko du, baita Orbeak ere.
Kadete, junior, 23 urtez azpiko eta Elite Mailakoen artean, beste 23 txirrindulari izango dira. Gipuzkoako talde nagusiena dira, eta kategoria guztietan ordezkaritza izatea lortu dute. Aurten OTXEren eskolatik 3 txirrindulari gazte igo dira mendiko bizikleta taldera eta bi fitxaketa berri egin dituzte: Elite Mailako Patxi Plazaola eta 23 urtez azpiko Garikoitz Arizmendi (Gipuzkoako txapelduna Junior Mailan). Taldeen osaketa ikusteko, sakatu esteka honetan.
“Gozatu”
Aurkezpenak egin ondoren, Enekoitz Markos Kirol zinegotziak hartu zuen hitza. Proiektua oso garrantzitsua dela uste du, txikitatik kirolean aritzeko aukera ematen duelako, eta berdintasuna bermatzen duelako. Gainera, OTXEren arduradunak langile “oso serioak” direla aipatu zuen, eta haien lana eskertu: “Udalari beti laguntzeko prest daude. Gainera, eskualdeko taldea da, eta aberasgarria da elkar ezagutzea eta Oarsoaldeko txokoak ezagutzea”. Bizikletaren gainean gozatzeko eta ongi pasatzeko eskatu zien txirrindulariei.
Ondoren Jexux Leonet alkateari pasatu zion mikrofonoa. Txalo bat eskatu zuen OTXEko arduradunentzat: “Lan asko egin dute, horrelako talde bat ez da etorria”. Aholku bat eman zien txirrindulariei: “Kirola ez da lehiaketa bakarrik. Batzuetan, guraso asko horrekin itsutzen gara. Kirolak ematen digu elkarren artean laguntzea, kuadrilla bat, diziplina… Balore horiek bizitzan balio dutenak dira. Disfrutatu”.
OTXEkoak, beraz, prest dira pedalkadak emateko. Nork daki taldekideren bat ez den etorkizunean Omloop het Nieuwsbladen ariko…
