Lezon Mendi Film, Lezo-Jaizkibel berotzen hasteko
Motorrak berotzen hasteko Lezon Mendi Film egingo dute lehenengoz. Bihar izango da hori Gezala auditorioan eta ez dute antolatzaileek sarrerarik banatuko, aretoa bete arte izango da bertaratzeko aukera.
Silvia Trigueros lasterkari bizkaitarra. Argazkia: Trailrun Igandean (hilak 24) helduko da Lezo-Jaizkibel lasterketa seigarrenez. Aurten ere berritasunekin helduko da lasterketa, eta motorrak berotzen hasteko Lezon Mendi Film egingo dute lehenengoz. Bihar izango da hori Gezala auditorioan eta ez dute antolatzaileek sarrerarik banatuko, aretoa bete arte izango da bertaratzeko aukera.
Mikel Urresti eta Iñaki Urrestik 2018an zuzendutako Tor filma emango dute, 19:00etan hasita. Dokumentalean, Silvia Trigueros mendiko lasterkari bizkaitarrak Alpeetako Tor des Geants proban (330 kilometrokoa, 24.000 metroko desnibelarekin) egindakoa dago jasota. Lehen aldiz egin zuenean bosgarren sailkatu zen bizkaitarra, eta berriz saiatu zen probaren zailtasunei, batez ere mentalei, aurre eginda. Proba hori irabazi egin zuen iaz Triguerosek.
