Greba feminista aho batez babestu du udalak
Horren arabera, Errenteriako Udalak ardura hartu du berdintasun erreala eta eraginkorra bermatuko duten politika publikoak burutzeko, baita zaintza lanak bere politika publikoen erdigunean jartzeko ere.
Atzoko plenoaren irudi bat. Alderdi guztiek bat egin dute Martxoaren 8ko greba feminista babesteko. EH Bilduk eta Errenteria Irabazizek adierazpen instituzionala aurkeztu zuten atzoko ohiko plenoan eztabaidarako, eta aho batez onartu zuen plenoak. Horren arabera, Errenteriako Udalak ardura hartu du berdintasun erreala eta eraginkorra bermatuko duten politika publikoak burutzeko, baita zaintza lanak bere politika publikoen erdigunean jartzeko ere.
Mugimendu feministak deitutako grebari babesa eman dio udalak eta ardura hartu du udaleko emakume hautetsi eta langileei greba egin ahal izateko erraztasunak emateko. Azkenik, herritarrak deitu ditu Emakumeen Nazioarteko Egunaren harira mugimendu feministak Martxoaren 8an antolatutako mobilizazio eta ekitaldietan aktiboki parte hartzera.
Horiek adostutakoak, baina testuinguruaren irakurketa zehatza egin du ginera adierazpen instituzionalak. Iazko Martxoaren 8an egindako emakumeen lan etenaldi deialdiari eman zitzaion erantzunaren arrean gizarteak mezu argia jaso zuela dio: “Kaleak bete ziren eta elkarlan sareak sustatu, emakumeek beren aukera berdintasuna aldarrikatzeko abian jarrita zuten borrokak atzera bueltarik ez zuela erakutsi zuten”.
Aurten greba orokorrera eitu du mugimendu feministak, mundua gelditu eta bizitzak erdigunera jartzera, azken hori izango da leloa, Bizitzak erdigunera! Udala adierazpenak beharrezkoa dela emakumeen lan prekarietatea eta pobrezia salatzea dio, baita indarkeria matxista guztien aurka egitea, eta bazterkeria eta arrazakeriari uko egitea, “gizarte honen barnean emakumeengan eragiten duten zapalkuntza eta diskriminazio sistema guztiak desagerrarazteko lanean gure udaletik era Martxoaren 8an Emakumeok planto egitea eta Bizitzak erdigunean jartzea aldarrikatuko dugu”.
Horretarako, nagusiki emakumeei egotzi zaizkion zaintza lanak eremu pribatutik atera beharra nabarmendu du adierazpenak, “zaintza eta etxeko lanen ardura sozializatu behar da eta gizonek eta erakunde publikoek ardura zuzenak hartu behar dituztela”. Denboraren erabilera orekatzea erabat estrategikoa dela gaineratu du berdintasun politikak eraginkorrak izan daitezen, “Europako Berdintasun Adierazleak kontuan hartzen dituen esparruetatik denborakoan eragiteak, boterea, ezagutza, dirua eta enpleguetako domeinuetan eragitea ere badakar”.
