Martxoaren bukaerarako, Lezo-Donibane bidegorriaren bigarren zatia egina
Lezo eta Donibane lotuko dituen bidegorriaren hirugarren eta bigarren faseak eginak izango dira horrela. Lehen zatia Donibanetik gertuen dagoena da.
Egunotan asfaltatzen ari dira bidegorria. Lanetan ezustekorik ez bada, martxoaren bukaerarako Lezo eta Donibane lotzeko egiten ari diren bidegorriaren bigarren fasea egina egongo da, jada asfaltatzen ari direlako. Horrela, hirugarren eta bigarren zatiak eginda egongo dira. Lehen zatia, Donibanetik gertuen dagoena eta aldi berean egiteko zailena, Gipuzkoako Foru Aldundiak hartuko du beregain.
Lanak bukatzear diren arren, oraindik errepideko bide batek moztuta jarraituko du, semaforo bidez arautzen ari delarik ibilgailuen joan-etorria. Lanak osotasunean bukatu arteko ez dira egongo zabalik errepideko bi bideak.
Gainera, Andreoneko parke osasuntsuan, bizikletei zerbitzu emango dien azpiegitura jarri dutela iragarri du Lezoko Udalak: bizikletak konpontzeko lanabesak daude bertan, baita gurpilak puzteko gailua ere.
Lezoko Udalak oroitarazi du bidegorriaren lanekin pertsonen segurtasuna, mugikortasuna eta ongizatea hobetzea duela xede, herritarrek oinezko zein bizikleta bidezko mugikortasun aukera segurua izan dezaten, “Lezoko Udalak pertsonen ongizatea bermatzeko lanekin jarraitzen du”.
