OTXEk kimu eta haur mailetako Gipuzkoako MTB Txapelketak antolatu ditu
Larunbat arratsaldean egingo dituzte txapelketak, Txara parkean. Kimu mailakoek bi itzuli eman behar diote 1,5 kilometroko ibilbideari. Haur Mailakoek, lau.
OTXEko gazteenak lehiatuko dira larunbatean. Pasa den astean aurkeztu zituzten OTXEren taldeak, gala xume batean. Asteburu honetan, berriz, maillot garbi haiek zikindu eta izerditzeko txanda izango da. Izan ere, OTXEk Mendi Bizikletako Gipuzkoako Txapelketa antolatu du datorren larunbaterako, martxoak 2. Zehazki, kimu eta haur mailatako txirrindulariak lehiatuko dira Txara parkean.
Kilometro eta erdiko luzera izango du ibilbideak. Kimu mailakoek bi buelta eman beharko diote eta haur mailakoek, lau. Lasterketa 16:00etan hasiko da, eta ordubete lehenago zabalduko dute izena emateko epea. Kanpotik datozenentzako, jakinarazi dute Ugaldetxo auzoko Frantzisko Urdinola kalean —hor hasi eta bukatuko da proba— egokituko dutela aparkalekua, baita hilerriaren inguruan ere.
Larunbateko lasterketarekin, mendiko bizikletaren erabilpena sustatu nahi dute, baita txirrindularitza eskola bera ere.
