Euskal Ligako pala motzeko finalerdiak jokatuko dituzte Txosteko bi taldek
Txost A eta Txost B gaur arratsaldean neurtuko dituzte indarrak, Madalensoro pilotalekuan. Ez da asteburuan palarekin jokatuko den partida bakarra izango.
Anaien arteko borroka izango da Madalensoron ikusi ahalko dena. Gaur arratsaldean Txost pilota elkarteko bi bikote nor baino nor ariko dira etxean, Madalensoro pilotalekuan. Txost A eta Txost B elkarren kontra ariko dira, 20:15etik aurrera. Ez da nolanahiko partida izango, Euskal Ligako Pala Motzeko finalerdietako bi partidetako bat izango baita.
Ordubete lehenago hasiko dira pilotak frontisaren kontra kolpatzen. Izan ere, Kimu Mailako partida bat jokatuko du Oiarpeko pilotari batek Hernaniko baten kontra, eskuzko modalitatean kasu horretan. Hemen ikus daiteke Oiarpeko pilotarien kartelera osoa.
Eta palara bueltatuz, Euskal Herriko Pala Txapelketa Irekiari dagozkion bederatzi norgehiagoka jokatuko dituzte bihar eta etzi. Protagonisten izenak zein ordutegiak ikusi nahi dituenak, hemen klik egin dezake.
