Feministen asanblada: "Ez dira modu isolatu eta bakartuan ematen diren erasoak"
Oiartzungo Feministen Asanbladak deituta, elkarretaratzea egin dute, eraso matxista salatzeko. Gaur zortziko grebarekin bat egiteko deia egin zuten.
Hamarnaka lagun bildu dira plazan. Oiartzungo Feministen Asanbladak deituta, hamarnaka lagunek bat egin dute astelehen goizaldeko eraso matxista salatzeko elkarretaratzearekin. Erasoa pairatu zuen emakumeari babesa emateko eta erasoa salatzeko elkartu direla berretsi dute: “Nahikoa da, haserre gaude, nazkatuta gaude!”.
Salatu dutenez, egungo sistema kapitalista patriarkalaren oinarri sendoena da emakumeen kontrako indarkeria, botere harremanen banaketa desorekatua bultzatzen duelako. “Horregatik, indarkeria sexistak lehen mailako arazo politiko, sozial, ekonomiko eta kulturala izaten jarraitzen du; ez direlako modu isolatuan eta bakartuan ematen diren erasoak”. Eraso matxisten atzean gizartearen antolaketa dagoela gaineratu dute.
Horregatik, indarkeria matxistaren gaia guztien ardura dela aldarrikatu zuten, eta instituzioen dei egin zieten emakumeen bizitza duintzeko prebentzio eta konponketa neurriak bere gain hartzea. Erakundeei luzatutako deiarekin batera, autodefentsarako deia egin zuten. “Gure bizitzak dira jokoan daudenak”, gaineratu dute.
Martxoaren 8rako deia
Gaur zortzi Martxoak 8 izango da, eta bertan parte hartzeko deia egin dute, hainbat arrazoirengatik: “Indarkeria matxistarik eta heteroaraurik gabeko bizitza anitzak nahi ditugulako, prekarietatea lan mundutik haratago doalako, arrazakeriarik eta kolonialismorik gabeko bizitzak nahi ditugulako eta bizitzak erdigunean jarri nahi ditugulako”.
Bost ardatzetan antolatu dute greba feminista: pentsionista, ikasle, zaintza, enplegu eta kontsumo greba. Erronka handia izango dela esan dute, baina aurten ere bai historia egin nahi dute: “Mundua geldituko dugu mundua mugitzeko! Iraultza gugan da, iraultza gu gara, feministok grebara!”. Martxoak 8ko egitaraua gogorarazi dute bide batez:
- 08:00etatik 10:00etara: Auto karabana feminista, Alcampotik abiatuta.
- 10:00etatik 12:00etara: Photocall feminista, eta erabiliko den materiala sortzea, Done Eztebe plazan.
- 12:00etan: Manifestazioa, Kapitalismo heteropatriarkalari planto! Bizitzak erdigunera lelopean, plazatik abiatuta.
- 14:00etan: Bazkari autogestionatua, plazan.
- 16:00etan: Musika, plazan.
- 19:00etan: Manifestazioa, Errenteria-Oreretan.
