Soinueneak eta Abaraxka ludotekak azken hilabeteetan elkarlanean landu dituzten erraldoiak kalera aterako dituzte lehenengo aldiz. Oiartzunentzako dira.
Abaraxka eta Soinueneak antolatuta, azken hilabeteetan erraldoi txikiak sortzeko tailerrak egin dituzte. Pixkanaka aritu dira prozesua osatzen: erraldoien adibideak ikasi, diseinatu, sortu, dantzak ikasi… Oraingo azkeneko urratsa egitea falta da: kalera ateratzea.
“Lanketa luzea bezain aberatsa izan da”, adierazi dute proiektuaren dinamizatzaileek. “Auzolanean eta familia giroan, diseinuaz gain, sormen lanetan ere ibili gara, mailu, kola, guraize eta iltzeak baliatuz”. Hala ere, ez da eskulanak egitera mugatu: prozesu guztia auzolanean eta hezkidetzan egin dute. “Generoa, kultura, hizkuntza gutxituak, gure eskualdean haurrekin lanean aritzen diren hainbat elkarte eta gure eguneroko errealitateko bizipenak ahaztu gabe egin dugu lan”, gaineratu dute. Helburua Oiartzun herriarentzako erraldoi txikien konpartsa bat eskaintzea da.
Prozesuaren emaitza datorren larunbatean, hilak 9, ikusteko aukera izango da. Egun hori aukeratu dute Martxoak 8ari keinu bat egite aldera. Erraldoi txikiei atsolorra 16:30ean izango da, Done Eztebe plazan. Eguerdian, berriz, 13:00etatik aurrera, erraldoien topaketa egingo dute toki berean.