[Galeria eta bideoa] Errenteria-Oreretako feministak etorkizuna idaztera atera dira
Auto karabana egin dute herriko auzoetatik zehar. Horrez gain, karpa feministan grebarako materiala sortu dute, informazio puntua jartzeaz gain.
Izena: Martxoak 8. Greba feminista. Gidoilaria: mugimendu feminista. Idazteko gailua: espraiak eta errotulagailuak. Soinu banda: klaxonak eta abesti aldarrikatzaileak. Eszenatokia: Errenteria-Oreretako kaleak. Aktoreak: emakumeak. Argudioa(k): asko.
Martxoaren 8a da gaur, Emakumearen Eguna. Errenteria-Oreretako mugimendu feminista goiz-goizetik hasi da greba eraikitzen. Pontikatik auto karabana atera da, eta Beraun, Alaberga, Musika Plaza, Erdigunea, Agustinak, Fanderia eta Gabierrota gurutzatu ditu, klaxon jotzeekin, greba eguna dela gogorarazteko.
Ia paraleloki, Agirre Lehendakariaren plazan karpa feminista ireki dute, eta han aritu dira pankartak eta kartelak egiten, baita hainbat tailer ere. Horretan jarraituko dute, 12:00ak arte. Orduan hasiko da manifestazioa. Baina horrez gain, mobilizazio gehiago egingo dituzte, festa giroko momentuei muzin egin gabe. Hau da egitaraua:
- 14:00etan bazkari autogestionatua karpa feministan.
- 15:30ean Tribial Feminista karpa feministan.
- 17:00etan informazio banaketa erdialdeko kaleetan; arratsaldean zehar, berriz, kartel eta pankarta tailerra antolatu dute egindako horiek manifestazioan erabiltzeko.
- 19:00etan manifestazioa Herriko plazatik abiatuta, Oarsoaldeko manifestazioa izango da azken hori.
- Afari autogestionatua, karpa feministan. Afariaren ondoren, Grebaren aztarnak: mikrofono irekia.
