Labore Oarsok bere lehenengo bi urteak ospatuko ditu larunbatean
Bertsoak, bideo proiekzioa eta produktu dastaketa egingo dituzte dituzte Ugaldetxoko egoitzan, arratsaldez. Goizean urteroko ohiko batzarra egingo dute.
Bi urte dira Labore Oarsok bere ibilbidea hasi zuenetik. Kontsumo kooperatibak 2017ko martxoaren 25ean ireki zituen bere ateak, eta urteurren zehatzaren ospakizuna bi egunez aurreratu dute. Larunbat arratsaldean, 17:30etik aurrera, egingo dute ekitaldi nagusia.
Lehenik eta behin, aurkezpen hitzaldia egingo dute, eta ondoren Jon Martinek ongi etorri bertsoa botako du. Ondoren, kooperatibaren ibilbidea errepasatuko duen bideoa proiektatuko dute, Ekain eta Malen Elizasuk kantatu aurretik. Agurraren ondoren, Labore Oarsoren produktuak dastatzeko aukera egongo da.
Larunbatekoa egun konpletoa izango da kooperatibaren kideentzat. Izan ere, goizean, urteroko batzar orokorra egingo dute Manuel Lekuona bibliotekan, 11:30ean hasita. Honakoa izango da bileraren gai zerrenda:
- 2018aren balantzea.
- 2019ko dendaren martxa.
- 2019ko inbertsio berriak.
- 2019ko ekimenen aurkezpena: hitzaldiak, sukaldaritza tailerrak, ekoizleen aurkezpenak…
- Partaideen hitz-hartzea.
