Mendi lasterketen zaleek zita berri bat izango dute maiatzaren 5ean: Landarbaso Trail. Herriko gazte kuadrilla batek, Urdaburu mendizale elkartearen babespean, lasterketa antolatu du lehenengoz.
Unai Esnal eta Xabier Sors, lasterketa pasatuko den eremuan. 
Mendi lasterketak boladan daude. Oarsoaldean baziren Lezo-Jaizkibel, Intxixu Trail, San Markoko Igoera edo Mitxintxolako Igoera (Donibanen), eta orain Landarbaso Trail batu zaie. Lehia mota hori maite duen gazte kuadrilla baten ekimenez sortu da Errenteria-Oreretako lasterketa, lehen errenteriarrak bizi ziren parajeetan. Maiatzaren 5ean izango da, Listorretan hasi eta bukatuta.
Xabier Sors eta Unai Esnal ari dira antolakuntza lanetan —ia korrika bezain beste— izerdia botatzen ari direnetako bi. Mendi lasterketa bat antolatzeko urratsa eman zuten mendia gustuko dutelako. Esnalek azaldu du: «Bakoitzak bere kirol ibilbidea egin du —eskubaloia, futbola, txirrindularitza…—, baina batez ere batzen gaituena da mendia. Modarekin batera, mendian korri egiten hasi ginen hemendik. Hor hasi zen ideia». Horri beste faktore bat gehitu zitzaion: buruan zuten ibilbidea ikaskide izan zuten lagun baten —gaixotasun luze batek eraman zuen— etxe aurretik pasatuko litzatekeela, eta omenaldi txiki bat egin nahi zioten. Eta beste arrazoi bat ere bazuten: Errenteria-Oreretako txokoei—beraien herrikoak diren eta aldi berean korri egiten duten toki horiek— erakusleiho bat jarri nahi zieten.
Mendia gustuko duen lagun talde batek sortu du lasterketa, master lan bat oinarri
Ez ziren, baina, zerotik hasi. Esnalek kirol kudeaketarako master bat egin zuen, eta landu zuen proiektua Landarbaso Trail izan zen. «Lagunek bazekiten zertan nenbilen, eta ondoren zortzi laguneko talde eragile bati erakutsi nion, eta onartu zuten. Paperean zegoen hura Urdaburu Mendizale Elkarteari aurkeztu genion», azaldu du Esnalek. Izan ere, talde eragile horretako gehienak mendizaleen elkarteko kide dira. Oso argi zeukaten elkarteren baten babesa beharko zutela, eta edukitzekotan, herrikoa izan behar zuela. Harrera oso ona izan zuten hasieratik. Hasieran erronka handiegia zirudien lasterketari eutsi zioten, eta hilabete eta erdi barru izango dute.
Lezon eta Oiartzunen mendi lasterketak antolatzen dituzten taldeekin koordinatuta egon dira. Ibon Intxaurrandieta lezoarrarekin elkartu zen Esnal, masterreko lana egiterako garaian, baita benetako lasterketa diseinatzerakoan ere. «Berak gomendatu zidan lehendabizi aldundiko Ingurumen Sailarekin hitz egitea, oniritzia jasotzeko, bestela arriskua dago dena prest eduki eta atzera botatzekoa. Aiako Harria Parke Naturalaren barruan dago ibilbidea, eta baimenak behar ziren. Lehenengo track-a bidali genien, eta korreoz, informalki bada ere, haien oniritzia jaso genuen. Orduan martxan jarri genuen». Sorsek esan du aldaketa txiki batzuk daudela, baina aurre egin beharreko hemezortzi kilometroetan ez duela eraginik: «Kilometro bateko eragina dago. Zuzen jo beharrean, eskubira desbideratzen da. Ez da ibilbide osoa aldatu digun zerbait».
Behin ibilbidea zirriborratuta, babesle eta laguntzaileen bila atera ziren. Babesleei dagokienez, zortea izan dutela ziurtatu dute. Sors: «Ate batzuk jo ditugu, eta jo ditugun horiekin asmatu dugula dirudi. Oso gutxik esan digute ezetz. Askok ekarpena egin dute. Lehenengo urtea izateko, eta inork ez ezagutzeko, oso gustura gaude». Eskerrak eman dizkiete babesle zerrenda luzeari, baita Errenteriako Udalari ere. «Utz zezaketen material guztia utziko digute, eta tramite burokratikoak ere bai haiek bideratzen dituzte».
Orain boluntario bila ari dira. Zerrenda luze bat daukate —Urdaburukoak barne—, eta ibilbidean egon daitezkeen beharrak identifikatu eta bakoitzari dagokin betebeharra definitzea da orain esku artean daukatena.
Ibilbidearen xehetasunak
Ibilbideak hemezortzi kilometro izango ditu, eta 900 metroko desnibel positiboa. Esnalek eman ditu detaileak: «Lasterketari xarma ematen diona da Urdaburu mendia igotzen dela. Orain arte probatu duten guztiek esan digute oso polita dela. Ibilbideko tarterik teknikoena da, batez ere eguraldi txarrarekin. Urdaburuko biraren atzeko zatia oso polita da, errekatxo batzuk pasatzen diren tokitik. Oso azkarra da toki hori. Aldura igoko da gero; hori da lasterketaren bigarren tontorra, eta handik Susperregira joaten da, Aizpitarteko kobazulotik pasa, Listorretan bukatzeko». Aldapak beste lasterketetan baino motzagoak izango dira, baina ugariagoak, eta horrek emango dio gogortasuna, antolatzaileen arabera.
Aldapak beste lasterketetan baino motzagoak dira, baina ugariagoak
Sorsek, berriz, herritarrak animatu ditu lasterketa ikustera joateko. Abantailetako bat da lasterketa ez dela Listorretatik gehiegi aldentzen, eta pixka bat besterik ez dela ibili beharko. Susperregiko anoa puntua, Urdaburuko igoera —Añarbetik— eta Aldurakoa —Malbazarretik— gomendatu dituzte, baita hasiera eta eta bukaera izango den Listorreta ere. 118 lasterkarik eman dute izena jada. Pozik daude kopuruarekin, lehen urtea delako, eta uste dute azken unean batuko dela jende gehiago. Horretarako herrikrosa.eus webgunera jo behar da. Informazio gehiagorako, landarbaso.urdaburu[abildua]gmail.com e-posta helbidera idatz daiteke.
Biek txantxetan esan dutenez, nork daki lasterketa ez den eskualdeko zirkuitu baten hasiera izango…
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
