Aurten paper kontuak izango dira euskaraz egingo direnak
Euskararen normalizaziorako kanpainaren protagonistak aholkularitzak, inmobiliariak, aseguruak edota finka administratzaileak izango dira.
Oiartzunen aurkeztu dute kanpaina, euskara egunerokoan erabiltzen duen aholkularitza bulegoan. Eskualdeko lau udalak, Oarsoaldeko Euskara Batzordearen bitartez, urtero-urtero —eta 22 dira jada— saiatzen dira merkataritza edota ostalaritzako alorren batean euskararen normalizazioa sustatzeko. Aurten zerbitzu bulegoak izango dira kanpainaren protagonista: aholkularitzak, higiezin agentziak, aseguruak eta finka administratzaileak. Oiartzungo Zubillaga aholkularitzan egin dute aurkezpena, eskualdeko lau udaletako ordezkariek, merkatari elkarteetako kideek eta Zubillaga aholkularitzako Miren Oiartzabal eta Mirari Pikabea izan dira aurkezpenean.
Paper kontuak euskaraz nahiago izena jarri diote kanpainari. 35 zerbitzu bulegok hartuko dute parte, eta hainbat eskaintza egin dizkiete, hizkuntza paisaia euskaraz izatea laguntzeko, baita egunerokoan euskararen erabilera sustatzeko ere.
Gainera, ohi bezala, bezeroen artean sariak zozkatuko dituzte. Azaroaren 11tik 30era, urtean zehar zerbitzuren bat euskaraz baliatu duten bezeroen artean 20 euroko deskontuak zozkatuko dituzte. Parte hartuko duen establezimendu bakoitzeko 5 sari banatuko dituzte. Gainera, udalerri bakoitzeko, bi pertsonentzako otordu bana zozkatuko dituzte.
