Xanistebanak iragarriko dituen kartelaren proposamena egin daiteke
Kartel lehiaketa martxan da, eta maiatzaren 31ra arte aurkez daiteke kartela izateko hautagaia. Haur eta gaztetxoek ere izango dute aukera.
Aurtengo xanistebanak iragarriko duen kartela hautatzeko lehiaketa martxan da. Beren diseinua aurkeztu nahi dutenek maiatzaren 31ra arte izango dute horretarako aukera. Ohi bezala, Kultura Sailak antolatu du, eta bost dira emango dituen sariak: irabazleari (600 euro); oiartzuar onenari (300 euro; kartel irabazlea bada, bigarren oiartzuarrari); 50na euroko bi akzesit, eta haur eta gaztetxoen lanak sustatzeko, 100TZE espaziorako urtebeteko matrikula. Honakoak dira lehiaketaren oinarriak:
- Kartelaren neurria 70×50 zentimetro izango da.
- Teknika librea izango da.
- Kartelean derrigorrez XANISTEBANAK 2019 leloa agertuko da.
- Lehiaketan edonork parte har dezakete eta bakoitzak original bat baino gehiago aurkez ditzake.
- Originalak kartelen formato konbentzionalei egokiturikoak izango dira, karton pluma edo kartulina gogorrean entregatuko dira eta inprimatzeko modukoak izango dira.
- Parekidetasuna bermatzeko, genero-berdintasunaren irizpidea txertatzeko deia egiten da. Epaimahaiak kontuan hartuko du irizpide hau.
- Lanak Oiartzungo udaletxean aurkeztu behar dira maiatzaren 31ko eguerdiko 13:00ak baino lehen, egilearen izenik gabe eta kartazal itxi batekin. Kartazalaren barruan egilearen izen-abizenak, helbidea, telefonoa eta langabetua bada, froga-agiria aurkeztu behar ditu.
- Epaimahaia Oiartzungo Jai Batzordeak osatuko du eta bere erabakia ukaezina izango da.
