Errenta aitorpean euskaraz egitera deitu dute Oarsoaldeko lau udalek
Oiartzunek urteetan egin duen lanketaren haritik, Oarsoaldeko lau udalek errenta aitorpena euskaraz egitera deia egin diete eskualdeko zergadun guztiei.
Udalak kanpaina abiatu du herritarrek errenta aitorpena euskaraz egin dezaten. Iaz Errenteriako zergadunen %8,11k egin zuen aitorpena euskaraz (19.667 zergadunetik 1.596k); Lezoko %19,42k (3.166 zergadunetik 615ek); Oiartzungo %36,37k (5.523 zergadunetik 2.009k) eta Pasaiako %8,89k (7.849 zergadunetik 698k).
Kopuru horiek nabarmen haztea da helburua aurten, Sergio Ekizak, Oarsoaldea Garapen Agentziaren lehendakariak azaldu duenez, “errenta aitorpena euskaraz egiteak balioa ematen dio gure hizkuntzari”. Errenta aitorpena euskaraz egiteak, gainera, saria izango du. Uztaila hasieran, herri bakoitzean bi lagunentzako otordu goxo bat izango da saria. Horretarako errenta aitorpena euskaraz egin duten zergadunek izena eman beharko dute helburu horrekin prestatu dituzten txarteletan edo formulario digitala betez Oarsoarrak web gunean. Txartelak, udaletako herritarren arreta zerbitzuetan nahiz kanpainan parte hartuko duten establezimenduetan izango dira eskuragarri.
