Korrika 21 hasi dela ospatzeko, dokumentala eta 'klika-poteoa' Oiartzunen
'Txillardegiren klika' dokumentala eskainiko dute gaur arratsaldean Oiartzungo pleno aretoan. Kote Camacho zuzendaria bertan egongo da.
Gaur hasi da 21. Korrika, Garesen, eta Oiartzunen Korrika Kulturalarekin jarraituko dute. Gaur arratsaldean, Txillardegiren klika dokumentala eskainiko dute, donostiarra baita aurtengo ekitaldian omendu dutena.
Kote Camacho oiartzuarrak zuzendu du dokumentala, eta emanaldiaren ondoren berarekin solasean aritzeko aukera egongo da. Camachoz gain, Donostiako liburutegia elkarteko Dani Goñi eta Martin Anso ere hurbilduko dira udaletxeko pleno aretora. 19:00etan hasiko da saioa. Gainera, plaza inguruko tabernetan klika-poteoa egingo dute.
Gaurkoa ez da Korrika etorri aurreko jarduera bakarra izango. Gaur zortzi, hilak 11, Korrika-tonbola egingo dute Done Eztebe plazan.
Korrika Oiartzundik pasako den egunean —hilak 12— ekitaldi mordoarekin gozatzeko aukera egongo da. Bezperan bezala, Korrika-tonbola egingo dute Done Eztebe plazan, arratsaldean.
15:00etatik aurrera, Korrika Txikia ospatuko dute herriko kaleetan zehar, ikastetxeen biribilgunetik hasita.
17:00etan, berriz, bertsolariak, euskal dantzak, dantza garaikidea eta beste hainbat ekitaldi ikus ahal izango dira plazan. Korrika Gaztea 19:00etan hasiko da, eta ondoren afari merienda egingo dute. Ibargaingoek bat egingo dute Korrikarekin, musikarekin.
Arratserako, afariak antolatu dituzte, honako tokietan: Girizian (15 euro, euskaltegian erosi); Iturriozko frontoian eta kontsejupean, azken bi horiek autogestionatuak. 21:30ean Malen eta Ekainek kontzertua eskainiko, eta 23:00etan lasterketan parte hartzeko beroketa egingo dute. 23:48an iritsiko da Oiartzunera, Arraguatik. Korrika pasata, brindisa eta karaokea Kataxulon.