Migranteek Mediterraneoan bizi duten egoera larria ezagutarazi dute
'24 milia' dokumentala eskaini dute bibliotekan, eta ondoren Itsas Salbamendu Humanitarioko Iñigo Gutierrez solasean aritzeko aukera izan dute.
Oiartzuar dezente hurbildu zen bibliotekara. 10301 Elkartasun Keinu egitasmoak keinuak egiten jarraitzen du. Pasa den larunbatean, Mediterraneoa gurutzatzen saiatzen diren migranteen tragedia gertutik ezagutzeko aukera izan zuten oiartzuarrek. Manuel Lekuona bibliotekan 24 milia dokumentala eman zuten, Maydayterraneo proiektuak egin zuen lehenengo erreskatea azaltzen duena.
Ondoren, proiektuko kide Iñigo Gutierrezekin solasean aritzeko aukera izan zuten bertaratukoek, luze eta zabal. Mundua koloretsua eta anitza dela esan zuen, eta hori dela etorkizuna. Europara joan nahi dutenak ez direla bere gogoz joaten nabarmendu zuen, eta itsasoan ez salbatzea hilketak egitea dela. “Iristea lortzen duen itsasontzi bakoitzeko hamar bidean geratzen da”, gaineratu zuen Gutierrezek.
Gainera, nabarmendu zuen ez dela egia lana kentzera datozenik, europarrek egin nahi ez dituzten lanak egiten dituztelako. “Etortzen diren asko oso prestatuta daude, askok lauzpabost hizkuntza hitz egiten dituztelako”, zehaztu zuen.
Azoka solidarioa
Ez zen arratsaldean egin zuten ekitaldi bakarra izan. Haurtzaro Ikastolako LH6ko haurrak errifak saltzen aritu ziren plaza eta inguruetan. Gainera, azoka solidario bat egin zuten liburutegiaren kanpoaldean, materiala salduz, egitasmoak lortu nahi dituen 10.301 euroen langa gero eta hurbilago uzteko. Beraiek egindako produktuak —giltzetakoak, txapak…— edo krispetak saltzen aritu ziren. Eltzetxoak ere jarri zituzten, eta herriko hainbat txokotan aurkitzeko aukera egongo da.
Diruz lagundu nahi duenak, dirua sar dezake honako kontu korrontean: ES 92 3035 0235 22 2350038982. Kontzeptuan Oiartzun jartzea eskatu dute, oiartzuarrek zenbateko ekarpena egiten duten kalkulatu ahal izateko. Aita Mari itsasontzia laguntzeko bideratuko da dirua.
Horrez gain, Zaporeak egitasmoa laguntzen jarraitzen dute. Datorren ostiralera arte, Oiartzungo hezkuntza zentro guztietan janariak biltzen jarraituko dutela gogorarazi du 10301 Elkartasun Keinuk.
