Aitor Gonzalez izango da PSE-EEren alkategaia
Gonzalezek esan duenez, Oiartzungo PSE-EEren hautesleek "gogo handia" dute alderdiak udalean ordezkaritza izan eta kudeaketari aire berri bat emateko.
Aitor Gonzalez (Donostia, 1975). PSE-EEk Oiartzungo Alkatetzarako hautagaia aurkeztu du: Aitor Gonzalez. Zuzenbidean lizentziatua da, masterra du hirigintzan, eta UNEDen Zientzia Politikoetako ikasketak egin ditu. Ibilbide politikoan, berriz, ez da hasiberria. Gipuzkoako Batzar Nagusietako kide da, Ibarrako zinegotzi izan da eta Errenteria-Oreretako alkate izan zen Juan Carlos Merinoren kabineteburua izan zen. Gainera, aurreko hauteskundeetan herri horretako primarietara aurkeztu zen.
Gonzalezek esan duenez, bere alderdiak eskaini dion erronkari ilusioz eutsi dio, eta udalbatzarreko kide izaten bada, uste du bere ibilbidean pilatutako esperientzia baliagarria izan daitekeela.
“Konbentzitua nago Oiartzungo PSE-EEko hautesleak desiratzen daudela ordezkaritza izateko. Kudeaketari aire freskoa emango dion ordezkaritza, eta Oiartzungo errealitate plural eta anitza presente izango duena”, gaineratu du alkategaiak.
PSEk ordezkaritza, azkeneko aldiz, duela 36 urte lortu zuen. Berriro sartu nahi dute udalean, eta gobernatzerakoan erabakigarria izan. “Honako printzipio hauetan oinarrituta gobernatu nahi dugu: gardentasuna, pluraltasuna, elkarbizitza, berdintasuna eta konpromiso soziala. Agenda soziala eta zerbitzu publikoen hobekuntza lehenesten ditugu”, esan du.
