EAJk Pasaiarako Plan Berezia bultzatzen jarraituko duela dio
Elkarlanaren aldeko apustua berretsi dute jeltzaleek
Trintxerpeko Hospitalilloan eraikiko duten plaza berriaren irudia “Biziberritze Plana sustatzen jarraitu eta pasaitarren interesak defendatuko ditugu proiektu guztiek herritarren beharrei eta eskariei erantzun diezaieten”. Hala adierazi du gaur Pasaiako EAJren alkategai Nahikari Oterminek beren “programaren azken ardatza” aurkezteko helarazitako prentsa oharrean.
“Pasaiari behin betiko bultzada emateko eta pasaitarren aukera berriak eskaintzeko landu dituzten proposamenak” aurkeztu dituzte eta besteren artean ondokoak nabarmendu: “Adinberri eta berrikuntza gunea; Ipar Herrerako enpresa gunea, Hospitalilloko plaza berria eta Trintxerpeko eta San Pedroko lonjako pasealekua eta estalki berriak”.
Norabide berean, San Pedron, aparkalekuaren arazoa arintze aldera, “Portuak Lonjako aparkalekua herritarren zerbitzura jar dezan sustatuko” dutela agindu du EAJk, eta lonjako lanen harira, zera aurreratu du alkategai jeltzaleak: “Portuak pabiloia eraiki beharko du eta ondoren, herritarren arteko harremanak sustatzeko eremua sortuko da gainean”. Oterminen arabera, aipatu espazioak “kirolari eta aisialdiari lotuta aukera berriak eskainiko ditu”, eta espazio estali bat ez ezik kafetegi bat izango duela aurreratu du. “Diseinu sinboliko eta adierazgarria izatea nahi dugu, Pasaiaren historiari eta itsasoari lotuta”.
