Hiru bertsolari oiartzuarrek Gipuzkoako txapelketarako txartela bilatuko dute
Jon Otegi, Jokin Irastorza eta Josu Ibarguren bertsolariak urrian hasiko den txapelketarako sailkatze fasean ariko dira.
Jokin Irastorza, Jon Otegi eta Josu Ibarguren, 2017ko herriartekoaren aurkezpenean. Gipuzkoako Bertsolari Txapelketa urrian hasiko da, baina bertan egongo diren bertsolariak zehazten asteburu honetan bertan hasiko dira. Maiatzean zehar sailkatze faseak egingo dituzte, eta bertan hiru oiartzuar izango dira: Jon Otegi, Josu Ibarguren eta Jokin Irastorza. Hirurak Oiartzungo Udal Bertso Eskolako kide dira. Iraitz Mateo da euren irakaslea. Mateo bera sartuko litzake sailkapen fase horretan, norbaitek huts eginez gero.
Aurreko txapelketetan, sailkapena bilatzen zuten bertsolariek joan eta etorriko saio bana izaten zuten puntuak pilatzeko. Aurten, baina, saio bakarrean jokatuko dute lepoa, eta sorpresentzako aukera gehiago egon daiteke.
Irastorza, igandean
Irastorza izango da lehena. Igandean lehiatuko da, Orioko Kultur Etxean. 17:00etan hasiko da saioa, eta ordubete lehenago irekiko dute txarteldegia. Ateak, berriz, 16:30ean. Oholtza gainean, Irastorzarekin batera, egongo direnak honakoak izango dira: Asier Azpiroz, Oier Aizpurua, Urko Egaña, Andoni Otamendi Arsuaga eta Joseba Andoni Agirre Orbegozo.
Jon Otegi izango da hurrena, hilaren 19an. Legorretaraino joango da, bertako antzokian egingo duten saioan protagonista izatea bilatzeko. Honakoekin partekatuko du mikrofonoa: Manex Mujika, Aitor Urbieta, Imanol Lizarazu, Ander Goikoetxea eta Aimar Sorazu.
Etxetik hurbilen arituko dena Josu Ibarguren izango da. Donostiako Larratxo auzoko kultur etxean izango du saioa, hilaren 25ean. Bere lehiakideak honako hauek izango dira: Iñigo Mantzizidor, Iñaki Zelaia, Oier Etxeberria, Haizea Arana eta Ane Beloki.
Sailkatzen badira, urrian zain izango dituzte Ander Lizarralde eta Alaia Martin. Baina oraindik bertso saio batzuk falta dira horretarako.
