EAJk "anbizio handiko programa egingarria" aurkeztu du
Rafael Bergaretxe alkategaiak buru duen taldeak zein proposamen egingo dituen xehatu ditu, arloz arlo, jarraitzaileekin egindako ekitaldian.
Oiartzungo batzokian aurkeztu zuten programa. EAJk bere programa aurkeztu zuen atzo arratsean, batzokian, bere kide eta jarraitzaileen aurrean. Alkatetzara iritsiz gero aurrera eramango dituzten proiektuen berri eman zuen Rafael Bergaretxek, jeltzaleen alkategaiak. “Oiartzun herri desberdina izaten jarraitzea nahi dugu”, adierazi zuen, “berezia, erakargarria, baina baita ere garai eta errealitate berriei egokitzeko gai dena, irekiagoa eta soluzioak bilatzen dakiena”.
Horretarako, hainbat erronkei aurre egin nahi dietela esan zuen, luzamenduetan ibili gabe: “Anbizio handiko programa egingarria dugu”. Oiartzun indartsua nahi dutela berretsi zuen, bai ekonomikoki baita sozialki ere. “Oiartzun indartsu hori herritarren eskutik eraiki nahi dugu, elkarlanean eta elkarrekin”.
Elkarbizitza eta txukuntasuna
Bergaretxek elkarbizitzaren aldeko apustua egin zuen, udalaren eta herritarren arteko harremanak errespetuz eta gizalegez egin nahi dituztela esan zuen. “Gure herriko erakundeetan demokrazia arau eta lege dugula, gure buruaren jabe garela eta elkartasun beharra aintzat hartuta. Zer konpondu asko dugu, herritar guztion arteko giroa berregiten lana badugu”, esan zuen EAJren alkategaiak.
Legegintzaldiko plenoetan askotan aipatu duten gai bat ere azaleratu zuen Bergaretxek: Urkabe Baita. Etxea ireki nahi dute, eta parke publiko bat bihurtu.
Garbiketaren —oro har— gaiei heldu zien ondoren. Herriko kaleen garbiketa eta txukuntasuna zainduko dutela esan zuen: “Adierazpen askatasuna, bai; herriko bazterrak eta eraikinak bereganatu eta itsusteko estetikari, ez; sekula eta betiko pintadari ez; eremu publikoko pankarta, kartel permanenteei, ez”.
Hondakinen atez ateko bilketa sistema aldatu nahi du. Esan zuenez, sailkatze datuak onak direla, baina hainbat oiartzuarrek beste herrietan botatzen dituztela hondakinak. “Gurearen pareko udalak badira antzeko maila lortzen dutenak, sistema malguagoekin: organiko eta errefusarako txipdun edukiontziak”.
Mugikortasuna
Oiartzun zortzi auzotan banatuta egonda, mugikortasuna izango da jeltzaleen programaren beste ardatzetako. Zentzu horretan, Ugaldetxo eta Elizalde auzoetan aparkatzeko hainbat arazo egoten direla azaleratu du, segun eta zein ordu eta tokitan.
Trafikoarekin jarraituz, ikerketa bat abiarazteko konpromisoa adierazi dute, euren iritziz puntu “oso problematikoak” badaudelako Oiartzunen: Lartzabal, Talaiako biribilguneak, Ugaldetxoko bidegurutzea, Elizaldeko saihesbidea… Aldundiarekin eta Eusko Jaurlaritzarekin elkarlanean ariko direla esan zuen. Proposamenen artean, Ugaldetxo-Txikierdi lotura berri bat egin nahi dute, biribilguneak arintzeko eta saihesbidea lurperatzea, Elizaldea berriro Learre eta Urkaberekin lotzeko.
Garraio publikoari dagokionez, Oiartzun eta inguruko herriak lotzeko denbora murrizteko plan bat bultzatuko dutela azaldu zuen Bergaretxek. Auzoak hobeto komunikatzeko, Topoaren adar arin martxan jartzea proposatuko dute.
Mugikortasuna gazteago izandakoan baino mugatuagoa dute adindu gehienek, eta adin segmentu horrentzako arreta eta zaintza handiagoa eskatu du Bergaretxek. “Etxez etxeko zerbitzua eskuratzeko aukerak zabaldu eta zerbitzua hobetuko ditugu, Oiartzungo zaharrek beren etxean bizitzen jarraitzea errazago izan dezaten”. Aldundiarekin elkarlanean, zaharrentzako zaintzapeko etxebizitzak eraiki nahi dituzte.
Kultura eta gizarte politikak
Arlo sozioekonomikoari dagokionez, etxebizitzak sustatu nahi dituzte, babes ofizialekoak, honako taldeentzat: gazteentzat, guraso bakarreko familientzat, 55 urtetik gorako lanik gabekoentzako eta babesgabeko pertsonentzat.
Enplegua lortzeko politika aktiboak bultzatu nahi dituzte, batez ere 55 urtetik gorakoei zuzenduta daudenak. Horretan ere aldundiarekin eta Gasteizko gobernuarekin elkarlanean aritu nahi dute, merkataritza, ostalaritza eta nekazaritza ustiapenak bultzatu eta gurasoengandik seme-alabengana pasa daitezen errazteko.
Kulturari dagokionez, udalbatzako kideak beti euskaraz aritzeko konpromisoa adierazi zuen Bergaretxek, baita herritarren hizkuntza eskubideak bermatzeko ere. Hizkuntzaz gain, jarduera ludikoak, jolasak, kultur eta arte jarduerak sustatuko dituzte.
Gazteleku bat sortu nahi dute, eta gazteentzako plan bat prestatu nahi dute, alkoholaren eta drogaren prebentzioa helburu izango duena. Gainera, aukera zabaldu nahi dute oiartzuar guztiek jarduera fisikoa egiteko aukera izan dezaten. Kirol taldeak laguntzen jarraituko dute, eta bide berriak urratzeko asmoa adierazi zuen Bergaretxek. Gainera, neskak gehiago federatzeko bideak bilatu nahi dute.
Gainera, plan estrategiko bat martxan jarri nahi dute, eta Oiartzun Irudikatu 2020-2030 izena jarri diote. Plan estrategikoak barnebilduko lituzkeen gaiak honakoak dira, besteak beste: adin nagusikoei zor zaien arreta, jarduera ekonomikoa, garapen urbanistikoa eta herritarren parte-hartzea.
Bukatzeko, Bergaretxek eskerrak eman zizkien zerrenda osatzera animatu diren pertsona guztiei. “Oiartzunen alde konpromiso irmoa erakutsi dute, entzuten jakinez eta elkarbizitza bultzatuz”, zehaztu zuen.
“Gure helburua oiartzuarron ongizatea handitzea dela, eta herritarren zerbitzura ondo aritzea, beraien arazo eta kezkekin jakitun baikaude. Udaletik lehentasuna emango diogu herritarron arteko harremanak eta elkarbizitza errespetuz eta gizalegez berritu eta oneratzeko ahaleginari”.
