Mende laurdena bete du Oiartzun eta Karaezen arteko senidetzak
Bretainiako udalerriarekin 1994an senidetu ziren, eta hainbat bidai egin dituzte hangoek zein hemengoek, besteen herria ezagutzeko.
Oiartzuar talde bat, Karaezen. Pasa den maiatzaren 14an bete dira 25 urte Oiartzun eta Karaez udalerriak senidetu zirenetik, hitzarmena Oiartzunen sinatuta. Hitzarmen hori berretsi zuten 1994ko maiatzaren 21ean, Bretainiako herrian. Jon Iñarra zen Oiartzungo alkate eta Jean-Pierre Jeudy Karaezkoa.
1993an hasi zen herritar talde bat bi udalerrien arteko harremanak sustatzen, Oiartzun-Karaez Senidetza Elkartea, Joxe Mari Mendikute lehendakari zela. Urtebete geroago instituzionalizatu ziren. 25 urte hauetan oiartzuar asko joan dira Karaezera, eta Bretainiatik ere etorri dira Oiartzunera.
Kirol, kultura, hizkuntza eta ekonomia mailako harreman ugari izan dituzte bi herriek urte hauetan guztietan. Azken urtean, adibide bat jartzeagatik, bakoitzaren hizkuntzaren aldeko lasterketetan egon dira: karaeztarrak Korrikan eta oiartzuarrak Redadegen.
