Normaltasuna bueltatzen ari da Oiartzunera, euriteen ondoren
Atzo goizean botatako euriak kalte batzuk eragin ditu Oiartzunen, baina ez da ezer larririk gertatu. Udala garbitzen ari da.
Herribide batzuetan eragin zuten euriteek [Argazkia: Oiartzungo Udala].. Euria gogoz bota zuen atzo Oiartzunen. 127,7 litro metro koadroko bota du, eta horrek hainbat kalte eragin ditu herriko hainbat txokotan. Materialak, ez baita ezbehar pertsonalik egon.
Oiartzungo Udaltzaingoak balantze txiki bat egin du. Igandea sartu berritan hasi ziren lanean. “Oiartzunen orografia nahiko berezia da: ura daukagu, mendia, baserriak… Goizean goiz hasi ziren bideak ureztatzen; Talaia industriagune inguruan badaukagu erregela bat Oiartzun ibaiaren altuera neurtzen duena”, adierazi du Udaltzaingoak. Ura zein mailatan dagoen ikusita, badakite non egingo duen urak gainezka.
Herribide batzuk moztu behar izan zituzten, goizaldeko ordubietatik aurrera. Bizilagunak esnatzen joan ziren heinean, beste arazo mota batzuei aurre egiten hasi ziren: garaje eta etxebizitza batzuetan ura sartu zen. “Udalak dituen motoponpa batzuk eraman genizkien kaltetuei, ura pixkanaka ateratzen joateko”, gaineratu dute.
Garbiketa
Kalte ikusgarriena luiziak izan ziren. Tamaina handiko luiziak izan ziren, eta tarte batzuetan, bide tarte guztia moztu behar izan zuten. Gaur hasi dira makinaria pisutsuarekin hori garbitzen. Luizi handienetakoa bidegorrian izan zen —batez ere Ergoien eta Karrikan—, eta itxita dago; metro kubiko asko mugitu ziren, eta jasotzen ari dira.
Beste luizi batzuk izan ziren, txikiagoak. “Herribideak ez zituzten zeharo moztu, eta erabiltzaileak, gainera, 4×4 dituzte eta hala nola pasatzen dituzte. Guk egin genuena izan zen seinalizatu eta bizilagunak ohartarazi”. Udal brigada ari da horiek garbitzen, jakinarazi dutenez.
Bestela, ez zuen kalte handirik sortu, Errenteria-Oreretaren kasuan bezala. Garaje eta etxebizitzaren batera sartu zen ura. “Garaje txokoren bat-edo kaltetu zen, baina askoz gehiago ez. Pagoaldea industriaguneko enpresaren batean ura sartu zen, mendian egindako uholde txikiengatik. Lintzirinen autoak aterarazi genituen, garajeetan ura sartzen ari zelako”.
Orain, lanean jarraitzen dute, Oiartzun pixkanaka normaltasunera bueltatu dadin.
