Bergaretxe: "Zerbait gehiago espero genuen, baina aurrera egiten ari gara"
Oiartzun Irratian balantzea egin du jeltzaleen alkategai izan denak. Botoetan gora egin duten arren, aurretik lan handia dute egiteke.
Bergaretxe, igandean botoa ematen, Elizalde ikastetxean. Hauteskunde eguna pasa eta bi egunetara, EAJko alkategaia izan den Rafael Bergaretxek emaitzen balorazioa egin du goizean, Oiartzun Irratian. Lehenik eta behin, EH Bildu zoriondu, izan zuen arrakasta handiagatik. “Orain gobernatzeko legitimitate handiagoa izango dute”, gaineratu du.
EAJk “zerbait gehixeago” espero zuela aitortu du, seigarren zinegotzi bat. Hala ere, ez da triste: “Udal hauteskundeetan 94 boto egin ditugu gora, eta batzar nagusietakoan, 2015etik ia 200 boto gehiago eskuratu ditugu”.
EAJ Oiartzunen kontsolidatzen ari dela antzeman du Bergaretxek, eta aurrerapausoak eman dituztela. “Gure politikak ezarri nahi baditugu, lan handia dugu aurretik. Aurrerapauso hauek indarra ematen digute”, zehaztu du.
Kanpainan zehar izandako giroa demokratikoa eta lasaia izan dela berretsi du. Hemendik aurrera, herritarrek ekarpenak egin nahi izanez gero, zinegotzi taldea haiek entzuteko prest dagoela nabarmendu du, eta batzokiko ateak irekita izango dituztela.
