Kuadrillategikoek azken desafioa Oiartzunen egingo dute
Lau herrietako 400 bat gazte larunbatean elkartuko dira Oiartzunen. 'Desafioak' egitasmoaren finalerdiak eta finali jokatuko dituzte.
Datorren larunbatean, Oarsoaldeko lau udalerrietako 400 bat gazte elkartuko dira Oiartzunen. Kuadrillategi egitasmoan egon diren 12 eta 16 urte arteko 400 bat gazteek azkeneko saioa izango dute. Urte dezente dira Kuadrillategi hasi zutela, gaztetxoen artean euskarazko ohiturak finkatzeko helburuarekin.
Desafioak izeneko erronka sorta egiten aritu dira, herrietako gazteen arean harremanak sustatzeko asmoz. Ikasturte osoan jokatu dituzte: herri batek beste bati desafioa bota, eta ordubeteko proba egin izan dute.
Jardunaldi bakoitza baino astebete lehenago talde desafiatzaileek mezu bat helarazi diete talde desafiatuei. Mezu horiek edozein formatutan egin eta bidali ahal izan dituzte —bideo labur bat, audio bat, idatzi bat eta abar—. Desafiatzeko modu originalenak ere saria izango du.
25-30 bat gaztek osatutako zortzi taldek hartu dute parte. Hiruna izan dira Oiartzungoak eta Pasaiakoak, eta bana Lezo eta Errenteria-Oreretakoak. Larunbatean Desafioak saioetako final aurrekoak eta finalak jokatuko dituzte DBH-1ekoek Kuadrillategi egunean.
Egitaraua
Kuadrillategin ibili diren gazteak 11:00etatik 17:00etara egongo dira Oiartzunen. Honakoa izango da egun osoko egitaraua:
- 11:00etan, oiartzuarrek harrera egingo diete Landetxe plazan gainerako herrietako gazteei. Segidan, Desafioak saioetako final aurrekoak eta finalak jokatuko dituzte DBH-1ekoekoek. DBH-2, 3 eta 4koek Banden lehia eta Got Talent moduko bat egingo dute musika taldeak eta bakarlariak imitatuz.
- 13:30etik 15:00etara bazkaltzeko tartea izango da.
- 15:00etatik 17:00etara Dj Bull-en musika emanaldia denentzako Oiartzungo plazan.
- 17:00etan agurra egingo diete oiartzuarrek gazte guztiei Done Eztebe plazan.
