[Galeria] Eguzkiak ere ez du galdu festa
Jende ugari hurbildu da Errenteria-Oreretara. Ekitaldirik jendetsuenetakoa, zalantzarik gabe, Pirritx, Porrotx eta Marimototsen Musua ikuskizuna. Arratsaldean kontzertuak izango dira protagonistak, baita tailerrak ere.
Itzal bila ari dira bazkal orduan bertaratu diren asko eta asko. Euskal Eskola Publikoaren aldeko oihartzuna ez da nolanahikoa izaten ari gaur. Jendetzak egin du bat Euskal Eskola Publikoaren jaiarekin. Hamaika ekitaldi egiten ari dira, etengabean, festarako atondu dituzten sei guneetan. Eguzkiak ez du kale egin, eta puzgarrietarako, tailerretarako eta bazkaria lortzeko ilarak luzeak izan badira ere, itzala harrapatzekoak ere halakoak izan dira. Zumardiko janari postuetan bildutako diru guztia, gainera, Zaporeak elkartearentzat izango da.
Jendetza izugarria ere, Pirritx, Porrotx eta Marimototsen Musua ikuskizunean, karpa goraino bete da Agirre Lehendakariaren plazan.
16:00etan hasita Demode Quarteten ikuskizuna eta Nogen taldearen kontzertua izango dira Zumardian. Izaki gardenak taldea arituko da Herriko plazan 17:00etan hasita eta Ane Guria Ondartxo gunean 16:00etan. Kale animazioa egun guztian zehar izango da.
