Oiartzun-Karaez senidetza elkarteak botako du txupina
Aurten 25 urte bete dira Bretainiako herriarekin senidetu zirenetik. Herriko alkate Christian Traodecen esku utziko dute ohorea.
Xanistebanetako Jai Batzordeak beste erabaki baten berri eman du aste honetan: xanistebanetako txupina botatzeko arduradunarena. Oiartzun-Karaez Senidetza Elkarteak botako du suziria, Oiartzun eta Bretainiako udalerriak senidetu zirela mende laurden betetzen baita aurten. Elkarteak, bere aldetik, Karaezeko alkate den Christian Troadeci emango dio ohore hori.
25 urte hauetan bi herrien arteko zubi lanak egin dituen elkartea omenduko dute, egindakoren aitortza moduan.
Kultur ekitaldian, presentzia
Bi udalerrien arteko harremanak abuztuaren 1eko kultur ekitaldian izango du txokoa. Espazio berezia emango diote xanistebanen aperitibo den horretan.
Senidetza 1994ko maiatzaren 14an egin zuten ofizial, Oiartzunen. Astebete beranduago hitzarmena Karaezen berretsi zuten. Ordutik, hainbat ekitaldi antolatu dituzte harremana indartzeko: oiartzuarrak Karaezera eta karaeztarrak Oiartzunera; bestearen hizkuntza propioaren aldeko lasterketan parte hartu; Haurtzaro Ikastolaren eta Gwissenyko diwanaren arteko elkartrukeak; Les Vieux Charrues jaialdian oiartzuar talde bat gonbidatu…
