Behetik gora egin dute arrosek denboraldiko lehen asteburuan
Hasi dira KAE1 eta ETE ligak. Batelerentzat urte zaila datorrela dirudi eta gogor aritu beharko dira. Mutilek nabarmen hobetu zuten larunbatetik igandera.
Larunbatetik igandera, nabarmen hobetu zuten mutilek Pasaiako badian. Argazkia: San Juan-Koxtape AE. San Juanek eman die hasiera ETE eta KAE1 ligei asteburuan. Larunbatean, nesken kasuan Igartza bandera zegoen jokoan eta mutilen kasuan III. Fegemu bandera. Bi traineru zeharo berriekin ekin zioten arrosek lehiaketari.
Erlojupekoak izan ziren sasoiko lehen estropadak eta egia esan, sanjuandarrak ez ziren erosoegi aritu denboraren aurka. 3 ziabogez osatutako ibilbidean, ez ziren nahi bezain gustura aritu eta 6. postuan bukatu zuten Juan Mari Etxaberen mutilek. Hala ere, emaitza bestelakoa izan zitekeen, lehia, segundo gutxiko borroka izan zen eta. 20 minutu eta 30 segundotan burutu zuten Donibaneko traineruak estropada, Pedreña baino segundo bakar bat eta gehiago, eta Plentziako Arkote baino hiru gehiago. Zarautz izan zen garaile.
Larunbatekoa batelera berrien lehen froga izan zen. Gazteak dira eta aurten gogor borrokatu beharko dute Guruzne Azpirozek zuzendutako neskek. Larunbatean 8. izan ziren arrosak. Zaleen aurrean, haiek eman zioten hasiera sasoiari eta lehen estropadan, txukun aritu arren, goiko postuetatik urrun bukatu zuten. 11 minutu eta 41 segundoko denbora arrosentzat Hibaika irabazleak baino 31 segundo gehiago.
Batelerek 8. postuan bukatu zituzten asteburuko bi estropadak. Argazkia San Juan-Koxtape AE
Igandeko Adegi bandera, ohiko estropada izan zen, traineruek parez pare egin zuten arraun Pasaiako badian. Dena dela, estropadaren panorama antzekoa izan zen neskentzat. 8. postuan bukatu zuten berriz ere, 11 minutu eta 33 segundo behar izan zituzten batelerek estropada bukatzeko, 7. izandako Hernanik baino 7 segundo gehiago. Hibaika berriz ere garaile izan zen, arrosei 29 segundoko aldea ateraz.
Bestelakoa izan zen egoera Etxaberen taldearekin. Ezustekoa eman zuten sanjuandarrek, 2. postua eskuratu baitzuten, bere txandako azkarrenak izan ziren gainera. Aurrera pausoa eman zuten atzo eta askoz ere sendoago aritu zirela nabari zuten bertaratutakoek. 20 minutu eta 59 segundorekin, bigarren izan ziren Zarautzeko Enbataren atzetik. Emaitzak, sailkapenean saltoa egitea ahalbidetu dio San Juan-Koxtaperi, eta 3. izango da sasoiko lehen estropaden ostean.
KAE2 Erandion
Arraunaren 3. maila ere hasi da asteburu honetan. Erandioko Ibaizabalek hartu zuen atzo KAE2 ligaren hasiera. San Juan-Koxtapek ordezkaritza izango du aurten ligan hartan, mutilen B trainerua hain zuzen ere.
Iazko gorabeherek eragin zuzena izan zuten B ontziarengan eta bertako hainbat arraunlarik lehen trainerura egin behar izan zuten salto. Gauzak horrela, hasiera nahiko apala izan zuten arrosek. 21 minutu eta 21 segundoz arraun egin 9. bukatu zuten Erandioko uretan.
