Eztenaren izurrite poetikoa zabaltzen ari da
Azken bi aste hauetan ari dira lanean sortzaileak, bakoitza zuzendari eta konpainia batek gidatuta.
Eztena Jaialdirako sortutako irudietako bat. Argazkia: Eztena Jaialdia Eztena arte eszenikoen jaialdiaren izurrite poetikoa Errenterian zabaltzen ari da jada. Guztira, 25 sortzaile ari dira lanean Errenteriako kaleetan eta bestelako espazioetan. Aurtengo Eztena berezia izango dela gogorarazi dute antolatzaileek, izan ere jaialdirako espresuki hiru antzezlan prestatzen ari dira 25 sortzaile, Errenterian bertan. Hiru proiektu, 25 sortzaile, probokazio bat izenburupean antzerkiaren izurritea zabaltzea dute helburu Eztena jaialdiarekin.
Azken bi aste hauetan ari dira lanean sortzaileak, bakoitza zuzendari eta konpainia batek gidatuta. Horman Poster konpainia, familia bereko lau kiderekin ari da lanean, Eraikitzen gaituzten hitzak proiektuaren barruan sortzen; Metrokoadroka kolektiboa berriz, zortzi sortzailerekin ari da Aldarri proiektuaren barruan; eta azkenik, Espe Lopez antzerkilaria beste zortzi sortzailerekin La mirada laborategia zuzentzen ari da. Lan horien emaitzak, hilaren 21etik 23ra ikusteko aukera izango da Eztena Jaialdiaren barruan.
Biztanleria gertutik ukitu nahi duten halako egitasmoez mintzatzeko hitzaldia antolatu dute gaur. Mikelazulo kultur elkartean izango da 18:00etan hasita. Kultur mediazioaren zenbait adibide izenburupean Rouge Elea konpainiako Corine Cellak eskainiko du saioa.
Eztena jaialdiaren egitaraua
Hilak 21, ostirala
- 17:00etan: Zamalbide kalea 4 zenbakian, Eraikitzen Gaituzten Hitzak, Horman Poster.
- 19:00etan: Herriko Plazan eta Zumardian: Aldarri, Metrokoadroka kolektiboa.
- 22:30ean: Niessen Kulturgunean: La mirada, Espe Lopez.
Hilak 22, larunbata
- 12:30ean: Pablo Sorozabal plazan, Aldarri, Metrokoadroka kolektiboa.
- 19:00etan: Niessen Kulturgunean: La mirada, Espe Lopez.
Hilak 23, igandea
- 12:30ean: Txirrita parkean, Aldarri, Metrokoadroka kolektiboa.
- 17:00etan: Zamalbide kalea 4 zenbakian, Eraikitzen Gaituzten Hitzak, Horman Poster.
- 19:00etan: Zamalbide kalea 4 zenbakian, Eraikitzen Gaituzten Hitzak, Horman Poster.
- 20:00etan: Niessen Kulturgunean: La mirada, Espe Lopez.
