Erasoaren ondorioz hildako gizonaren senideen eskura baliabide guztiak jarri ditu udalak
Errenteriako bizilagun batek Donostian igandean jasandako erasoaren eta ondoriozko heriotzaren harira erakunde adierazpena egin du Errenteriako Udaleko Bozeramaileen Batzordeak.
Donostian erasoa jasota hil den Errenteriako 61 urteko gizonaren senideen eskura beharrezkoak dituzten baliabide guztiak jarri ditu Errenteriako Udalak. Hala jakinarazi du Errenteriako Udaleko Bozeramaileen Batzordeak aho batez onartu duen adierazpen instituzionalean. Laburra eta zehatza da adierazpena. Erabat arbuiatu du igandean gertatu zen erasoa, eta hildakoaren senide eta lagunei elkartasuna adierazi die. Halaber, hildako bizilagunaren senideen esku jarri ditu beharrezkoak zaizkien baliabide guztiak.
Donostiako Udalak deituta, elkarretaratzea egin dute gaur eguerdian Alderdi Ederren. Donoistiako Udaleko alderdi politiko guztietako ordezkariek hartu dute parte elkarretaratze horretan, baita Errenteriako alkate Aizpea Otaegik eta EH Bildu, PSE-EE eta Elkarrekin Podemoseko ordezkariek.
