Ion Carballok erakustaldi bikoitza eman du Plentzian
Asteburuko bi probetan garaile izan zen Carballo. Aiora Irazu oiartzuarrak ere garaipena eskuratu zuen larunbatean, ur lasaietan.
Carballo Plentziako uretan, olatu artean. Argazkia: Pasaia Kayak Asteburu arrakastatsua izan da Pasaia Kayakeko kideentzat, hiru garaipen ekarri baitituzte etxera eta beste hainbatetan osatu dute podiuma. Plentziak hartu ditu asteburuko bi lehiaketak: Ibaietako Euskadiko Kopa ur lasaietan larunbatean eta Euskadiko Itsas Kayakeko Kopa, igandean.
Larunbateko K-1 Senior mailan, Ion Carballok aurreikuspenek ziotena bete zuen eta nagusitasunez lortu zuen garaipena, Jon Moreno Santiagotarrak taldeko palistaren aurretik. Pasaia Kayakeko Iñigo Loisek hirugarren postuan bukatu zuen. Azken metroetan bere abiadura inposatu zuen Carballok.
Aiora Irazu oiartzuarrak ere ez zuen hutsik egin. Aise irabazi zuen lasterketa Irazuk, Sara Tarragona taldekidearen aurretik. Emaitza hauei eta palista guztien ekarpenari esker, bigarren izan zen Pasaia Kayak taldekako sailkapenean.
Igandekoa bestelako proba izan zen. Carballok estu hartu zituen mendean aurkariak, Zumaia, Barrika eta Santanderreko ordezkariak alegia, baita Aritz Araneta taldekidea ere. Azkenean Carballok lortu zuen garaipena eta Aranetak laugarren postua, egindako lan txukunari esker. Taldekako sailkapenean, hirugarren izan zen Pasaia Kayak.
