Mende bat soinean
Xanti eta Maialen erraldoiek mendea beteko dute aurten, 100 urte lehen aldiz dantzan hasi zirenetik herria txiki uzten. Horren harira, egitarau oparoa antolatu dute uztailean.
Xanti eta Maialen iazko madalenetan Erein elkarteak antolatutako Erraldoi eta buruhandi topaketan. Xanti eta Maialen erraldoiek mendea beteko dute aurten, 100 urte lehen aldiz dantzan hasi zirenetik herria txiki uzten. Bide luze horretan berrikuntzak egin dizkiete, aurpegia garbitu nolabait,hezurretako gaitzak eta denboraren joan etorriak eragindako ajeetatik libratzeko. Kontuak kontu 100 urte beteko dituzte eta lehen egunean bezain lirain eta arin jarraitzen dute dantzan txikienen, baita helduenen gozamenerako ere. Berezi dira biak, bata zein bestea, banaezinak eta herriaren identitatearen zati bilakatu dira. Aurten ere, txupete mordoa zintzilikatuko dizkiete gerri bueltan bi erraldoiei haurrek.
Ez da nolanahikoa urteurrena eta hura ospatzeko egitaraua atondu dute uztailean zehar. Hala, uztailaren 6an, larunbatarekin, kalejira erraldoia egin nahi dute, Xanti eta Maialen buru, herriko kaleetan barrena. Herriko plazan hasita, Zumardia, Niessen elkartea, Biteri kalea, Foru plaza, eta Sindikato tabernatik pasata, Herriko plazan amaituko da. OarsoIrriak iniziatibak bat egitera deitu ditu herriko familiak. Zumardian hasiko dute ibilbidea eta 11:00etan egin dute hitzordua. Bertan egingo diete harrera Xanti eta Maialen erraldoiei. Kalejiran, txalapartariak, trikitilariak, danborrada, musikoak, OarsoIrriak eta Kuadrillen Egunaren antoaltzailea den #U23faktoriak hartuko dute parte.
Egun horretan bertan, baina arratsaldez, tailerrak egingo dituzte haurrentzat, eta 22:30ean kontzertu berezia antolatu dute Herriko plazan EMKE Musika Banda, Udal Txistulari Taldea, Landarbaso abesbatza, bertsolari eta dantzariekin.
Ez da baina ekintza bakarra izango. Xanti eta Maialen eta Buruhandien konpartsako kideak lehen eskutik lanean eta Xanti eta Maialen muntatzen eta prestatzen ikusteko aukera izango da uztailaren 5ean, ostirala. 19:00etan izango da hori, Herriko plazan, eta batez ere txikienei begira aukera paregabea hain maiteak dituzten bi erraldoien sekretu ia guztiak ezagutzeko.
Uztailaren 5etik 27ra gainera, Xanti eta Maialen argazki erakusketa egingo dute Xenpelar Etxean.
