Oarsoaldeko Ekonomia Sozialaren Mahaia eratu dute
Garapen ekonomikorako eredu ezberdin bat proposatu nahi dute, txikitik hasita eta beste eragile batzuekin saretuz, eskualdeko egoera sozioekonomikoa iraultzeko.
Oarsoaldeko arlo ezberdineko eragileak batuko dira mahaian. Oarsoaldeko Ekonomia Sozialaren Mahaia sortu dute Talaios kooperatibak eta beste 10 eragilek, eskualdearen beharrei erantzun herrikoi bat emateko asmoz. Oarsoaldeak bizi duen gainbehera ekonomiko kronikoa, erakunde eta sektore pribatuaren utzikeriaren ondorio dela uste dute mahaiko kideek. Utzikeria horren aurrean, herritarrek bere eskualdea berpizteko eredua proposatuko dute. “Guk egindakoa ez du zentzurik enpresa baten gisara jokatzen badugu. Lurraldeko bizi baldintzekin harremanetan jarduten dugu guk” esan du Amaia Oleaga kideak.
Ekonomia Sozialaren Mahaia, iaz egindako proposamen baten harira jaio da. Olatukoop taldeak, ekonomia sozialean oinarritutako tokian tokiko sareak sortzera deitu zuen iaz. Talaios kooperatibak deialdi horri heldu eta Oarsoaldeko testuingurua aintzat hartuta, sare hura sortzeari ekin zioten.
Talaiosek, deialdi propioa egin zuen, asmoen berri emateko, ekonomia sozialean jarduten zuten eragileak erakartzeko eta Oarsoalderari buruzko diagnosi sozioekonomikoa egiteko.
Proiektuak aurrera egin ahala, lan ildo nagusiak zehaztu dituzte, betiere, eskualdeko baldintzei jarraiki, “agroekologia, hezkuntza eta teknologia berriak” dira ekonomia eraldatzailerako atzeman dituzten esparru nagusiak.
Eraldaketa ekonomiko zein soziala, eta eragile ezberdinen arteko elkarlana aberasgarria dela berretsi du Oleagak, “Ekonomia soziala ez da sektore bat, egiteko modu bat baizik. Nekazaritza ekologikoarekin zein teknologia berriekin eraldatu daiteke. Komeni zaigu elkar lanean aritzea”.
Mahaiko kideek argi dute haiena behetik sortutako egitasmoa dela, izaera komunitarioa duela eta gizabanakoen autonomian oinarrituko direla. Eskualdeko bizi baldintzetan eragiteko, indarrak batu behar dituztela badakite eta bide hura jarraituko dute, mantso, baina sendo. Mahaia eratuta dago eta urritik aurrera, lan dinamika berriari ekingo diote.
