Arizmendi-enea berritzen hasiko dira, publikoari irekitzeko
XVIII. eraikinaren elementuak ahalik eta gehien mantenduko dituzte. Lanak bukatu ondoren, herritarrei irekita egongo da eraikina, hainbat funtziorekin.
Kanpoaldea eta barrualdea berrituko dituzte. XVIII. mendean eraiki zuten Arizmendi-enea etxea eta haren lorategian obrak egiten hasiko dira datorren astelehenean. Udalak aurreratu duenez, zortzi bat hilabeteko iraupena izango dute lanek, 515.000 euro pasatxoko aurrekontuarekin.
Eraikina ondare izendatuta dago, eta, horregatik, etxearen ahalik eta elementu gehien mantentzea izango da helburua. Fatxada eta teilatua konponduko dituzte. Hori kanpoaldeari dagokionez. Barrualdean, arizmenditarren etxebizitza izan zena errespetatuko dute, baliozko elementuak zein dekoratiboak bere horretan utziz. Berdin egingo dute ganbarako kapilarekin.
Hainbat funtzio
Obrak bukatzerakoan, Arizmendi-enea eta lorategia herritarrei irekita egongo da. Jauregiaren beheko solairuan turismo bulegoa jarriko dute, eta arizmenditarren etxebizitza bisitatzeko aukera egongo da. Gainera, garaje izandakoan erabilera anitzeko areto bat ezarriko dute.
Udalak jakinarazi duenez, jauregiaren berreskurapena eta izango duen erabilera zehazteko, elkarlanean aritu dira memoria historikoa lantzen duten herriko taldeekin.
