UEMAren Salto! udaleku ibiltariak Oiartzunen egingo du geldialdia
Hilaren 26an Usurbildik iritsiko dira udalekuetako gaztetxoak, eta gaua Oiartzunen pasatuko dute. Herriko ikasleek prestatu dute egun horretarako egitaraua.
Iazko udalekuetako argazkia [Egilea: uema.eus]. Udalerri Euskaldunen Mankomunitateak Salto! udalekuak antolatu ditu, 15 eta 18 urte arteko gaztetxoentzako. Helburua da udalerri euskaldunetako gazteen artean harremanak sortzea.
Hilaren 26an hasiko dira udalekuak, eta 30era arte iraungo dute. Usurbildik Arantzara joango dira oinez. 56 gaztek eta sei begiralek osatuko dute espedizioa. Horien artean hiru gazte oiartzuar ere izango dira.
Lehenengo gaua Oiartzunen pasatuko dute —ikastolan—, eta biharamunean Bera aldera abiatuko dira. Hala ere, hilaren 26an hainbat jarduera egingo dituzte herrian. Haurtzaro Ikastolako, Oiartzo Batxillergo Ikastolako eta Elizalde Institutuko euskara taldeetako ikasleak batuko dira espedizioko gazteei.
Iristen diren egunean harrera egingo diete, sherpa lanetan ariko dira eta Kontzejupean elkarrekin afalduko dute, Malen eta Ekain Elizasuren musikak girotuta.
UEMAk eta Oiartzungo Udalak ikasleekin elkarlana bilatu dute, eta ikasleak prest agertu direlako pozik daude bi erakundeak.
