[Galeria] San Joan Suak Trintxerpen eta Antxon
San Joan bezpera ospatzeko aukera baliatu zuten askok Trintxerpen eta Antxon. Asteburua eta tenperatura epela lagun izan zituzten.
Trintxerpeko su Nagusia, Ciriza Etxe alboko eremuan egin zuten. Atzokoa urteko gaurik motzena izan zen, urtean zehar gaizki joandako esperientziak su emateko unea. Antxotarrek eta trintxerpetarrek kalean eman zioten ongi etorria udari, giro epelean.
Trintxerpen musika eta sua uztartu zituzten arratsalde osoan zehar. Euskadi etorbidea itxi egin zuten eta ohiko legez, jendeak etxetik ekarritako mahaiak eta bestelakoak jarri zituen. Normalean errepidea dena, Trintxerpeko jantokia izan zen atzo abeslaria eta guzti. Suei ekin baino lehen, Sardinada egin zuten Euskadi etorbidean bertan.
20:30etan Pasaia Musikal eskolaren eskutik dantzaldia egin zuten erretzen ari zen zuhaitzaren inguruan, Gudarien Plazan. 23:00ak aldera, bi su erraldoi piztu zituzten, Ciriza Etxearen ondoan kokatzen den eremuan. Txikiena ezkerrean, haurrei zuzendutako sua zen, eskuinean erraldoia.
Antxon ere Gure Zumardia bete zuten. Urtero legez hamarnaka lagunek dantzatu zuten Alkartasuna Herri Dantza Taldeak antolatuta. 23:00tan piztu zuten sua, eta banan banan, zuhaitzaren aurrean kokatu ziren dantzariak, herritar ugari begira zituztela.
HITZAk Trintxerpe eta Antxoko hainbat irudi bildu ditu. Honakoak dira.
