Kirolean errespetuz jarduteko
Touringen kirol kultur astearen barruan oinarrizko futbolean ematen den bortxakeriaz eta giza balioez arituko dira bihar 19:00etan hasita Xenpelar Etxean.
Klubak ekainean egindako bazkaria. Argazkia: Touring Larunbatean hasi zuen Kirol Kultur Astea Touringek. Koldo Mitxelena ikastetxeko jolastoki estalian klubeko bazkaria egin zuten, eta bertan Touringeko partaide diren 300 neska-mutil baino gehiago izango dira. Kirolean errespetua sustatzea dute helburu astearen bidez, oinarrizko futbolean ematen den bortxakeria mahai gainean jarri eta gaiaz hitz egitea, baita giza balioen transmisioaz ere. Horri begira, mahai ingurua antolatu dute bihar; Xenpelar Etxean izango da 19:00etan hasita. Gaur egun futbolean ematen den bortxakeriarekin kezkatuta eta sentsibilizatuta daudela eta Touringek ekarpen hori egin nahi izan duela zehaztu dute.
Oinarrizko futbolaren gainean arituko dira, “edozein mailetan justifika ezinak badira ere adin horietan ematen direnak oraindik lotsagarriagoak direlako”. Horrenbestez, mahai inguruaren bidez zein eguneroko klubaren jardunean haurrei transmititu behar zaizkien balioak bultzatu eta sustatzeko bideak landu nahi dituztela zehaztu dute.
Mahai inguru horretan Kepa Sanz epaile ohia, Garbiñe Etxeberria Realeko nesken koordinatzailea, Juan Carlos Lopez Ubis Realeko Kirol Psikologoa, Jesus Orbegozo Egiluze Ikastetxeko Kirol Zuzendaria, Begoña Irazu foru aldundiko teknikaria, eta Jon Ansotegi Realeko jokalari ohia arituko dira. Moderatzaile lanetan berriz, Jon Gonzalo arituko da.
Eta gaiarekin jarraituz, antzerkiak ere izango du tartea. Ezti Jokuz kanpo antzezlana emango dute 19:00etan hasita Niessen Aretoan. Antolatzaileek nabarmendu dute ez dela haurrei begirakoa, gurasoei begirakoa baizik, eta bilildutako dirua Mindara elkarteari emango diote.
Astea amaitzeko bazkideen ekitaldia antolatu dute hilaren 27rako (osteguna), eta zehazki 50 urte bete dituzten bazkideei omenaldi egingo diete. Guztira 21 bazkide omenduko dituzte Xenpelar Etxean 19:00etan hasita.
