Egun batez, Cadiz izango da Errenteria
Cadizko Inauteria ikuskizuna egingo dute seigarrenez larunbatean. Bi talde arituko dira 22:30ean hasita Niessen Kulturguneko agertokian: Los niños sin nombre eta El Canijo de Carmona txirigotak, zehazki.
El Canijo de Carmona txirigota arituko da larunbatean Niessen Kulturgunean. Nahasita heldu direla pentsatuko du ziurrenik bat baino gehiagok, baina ez da hala eta inauteria aspaldian pasa bazen ere, larunbatean Cadizko Inauteriak izango ditugu etxean. Tradizioa bihurtzen ari da gainera, herrian Cadizko Inauterien emanaldia, honakoa dagoeneko seigarren ekinaldia du. Bi talde arituko dira 22:30ean hasita Niessen Kulturguneko agertokian: Los niños sin nombre eta El Canijo de Carmona txirigotak, zehazki.
Lehenek ahots ederrez, pasodoble eta kuple erritmoan osatutako errepertorioa eskainiko dute; bigarrenek berriz, 25 urteko antologia eskainiko dute, eta horretarako bere errepertorioko kanturik onenak bildu dituzte.
Antolaketan, urtero bezala, Beti Prest dantza taldea. Oharra ere utzi dute txirigotekin gozatu nahi dutenentzat: “Sarrera gutxi gelditzen da, beraz, mugitu beharko dute ikusd¡kizunarekin gozatu nahi dutenek”. Horiek eskuratzeko Niessen Kulturguneko bulegora jo beharko dute. Azken urteetan jaialdiarekin bat egin duten herritarrei eskerrak eman dizkie Beti Prest dantza Taldeak erakutsitako leialtasunarengatik, eta udalari ere, “Oreretan halako ikuskizuna gozatzeko aukera izan dezagun egiten duen esfortzuagatik”.
