Udal ordezkaritza adostua nahi du Pasaiako EH Bilduk
PSE eta EAJren akordioaren helburua, herritarren ongizatea baino, EH Bildu alkatetzatik urruntzea zela berretsi dute subiranistek. Herriak emandako mandatuari jarraiki, herri akordio zabala proposatuko dute.
Pasaiako EH Bilduk, elkarlanera deia hainbatetan luzatu die beste alderdiei Pasaiako EH Bildun, argi dute PSE eta EAJk azken unean lotutako akordioa, herriari bizkarra emanez egin zela eta alderdien interesei begira. Gainera salatu dute akordioak “oinarri programatikorik” ez duela, eta bi alderdiburuen arteko harremana gatazkatsua izan dela.
Hala ere, jarrera eraikitzailea izango dutela jakinarazi dute ez baitira “iraganera begira geldituko”. Alkatetzatik kanpo bada ere, herritarren alde lanean jarraituko dutela nabarmendu dute, “EH Bildukook, arduraz beteko dugu pasaitar gehienek eman diguten mandatua, herri akordioaren bultzatzaile nagusiak izatea”.
Udal hauteskundeen irabazlea izanik, koalizioko kideek uste dute zilegitasun nahikoa dutela, beste alderdiei ordezkaritza adostu dezatela eskatzeko. “Argi eta garbi berretsi nahi dugu kanpainan zein udala osatu aurretik egindako elkarlanerako deia”, adierazi dute Junkal Mintegia buru duen lantaldeak, eta beste alderdiei galdegin diete, proiektu bozkatuenarekin lan ildoak adosteko prest ote dauden. Udalaz gaindiko erakundeetako ordezkaritza, adostua izatea proposatu dute.
EH Bilduk gainera, Pasaian politikagintza beste modu batean egin behar dela aldarrikatu du. Herritarren duintasuna xede dutela, alderdiekin ez ezik, herri eragileekin biltzen hasiko direla jakinarazi dute.
