UEMAko udalerrietan hiztegiak banatuko dituzte turistentzako
Zazpi hizkuntzatan egongo dira banatuko dituzten hiztegi horiek. Oiartzunen 3.000 izango dira Turismo Bulegoan banatuko dituztenak.
Turismo bulegoan banatuko dituzte hiztegiak. Udak bete-betean jo du, eta turismo gehien egoten urteko aroa da. Udalerri Euskaldunen Mankomunitateak (UEMAk) azterketa egin du, turismoak herri euskaldunetan duen inpaktua aztertzeko. Horretan oinarrituta, zazpi hizkuntzadun hiztegia kaleratuko du: euskara-katalana-gaztelera-frantsesa-galegoa-ingelesa-alemana. Oiartzunen 3.000 ale banatuko dituzte, Turismo Bulegoan.
Bulegoa datorren astelehenean irekiko dute, abuztuaren 31ra arte. Egunero irekiko dute, 09:00etatik 14:00etara, eta 16:00etatik 19:00etara.
Katalunia eta Euskal Herritik
UEMAren azterketak utzitako datuen arabera, udalerri euskaldunak bisitatzen dituzten turista gehienak euskal herritarrak, kataluniarrak eta madrildarrak dira. Europatik etortzen direnak, berriz, hizkuntza gutxituak dituzten herrialdetakoak direla azaldu du UEMAk.
Azterketa Euskara teknikari eta Turismo teknikarien artean baloratu dute. Neurriak hartu dituzte, turismoak ahalik eta eragin txikiena izan dezan. Oiartzunek lantaldean parte hartu du eta Oarsoaldeko Turismo Bulegoko teknikariek ere bat egin dute.
