Enpresa batzordeak eta zuzendaritzak akordioa lortu dute Interal lantegian
Lan hobekuntzari begira urrats nabarmenak egin direla esan du ELAk: "Lan erreformei aurre egiteko klausulak jasotzen ditu akordioak eta funtsean, langileen egoera duintzeko bidean lorpen esanguratsuak lortu dira".
Lezon dago Interal enpresa eta 180 langiletik gora ari dira lanean bertan. Enpresa batzordeak eta zuzendaritzak akordioa lortu dute hitzarmena berritzeko Interal S.A enpresan. ELA sindikatuak eman du akordioaren berri, eta “pozik” azaldu da positiboki baloratu duelako. Saldak, zopak, saltsak eta jaki prestatuak egiten ditu Interal lantegiak, 180 langiletik gora ditu eta horietatik %65 emakumeak dira.
Lortu duten akordioak hiru urteko indarraldia du 2018, 2019 eta 2020 urteei eragingo die, eta urte bakoitzerako KPIa gehi 0,5eko soldata igoerak izango dituzte langileek. Ultraktibitate mugagabea izango du gainera hitzarmenak, eta behin behinean lanean ari ziren hamabi langile langile finko izatera pasa dira. Enpresa gainera, langileek hala eskatzen duten kasuetan errelebu kontratua egitera behartuta egongo da. Horiekin batera, hobekuntzak adostu dituzte baimen ordainduetan eta eszedentzietan, besteak beste.
Lan hobekuntzari begira urrats nabarmenak egin direla esan du ELAk: “Lan erreformei aurre egiteko klausulak jasotzen ditu akordioak eta funtsean, langileen egoera duintzeko bidean lorpen esanguratsuak lortu dira”.
