Gizon bat atxilotu dute pisukideari sexu erasoa egiten saiatzeagatik
Ostegun gauean izan ziren gertakariak. 43 gizon bat sexu erasoa egiten saiatu zen pisukideari. Emakumeak ihes egin zuen eta gela batean babestu Ertzaintza heldu zen arte.
Pisukideari sexu erasoa egiten saiatzeagatik 43 urteko gizon bat atxilotu zuen Ertzaintzak pasa den ostegun gauean. Alokairuzko etxebizitza partekatzen dute erasoa jasan zuen emakumeak eta erasotzaileak, beste hirugarren pertsona batekin. Emakumeak ihes egitea lortu zuen, eta bere gelan itxi zen babesteko Ertzaintza heldu zen arte.
Bizilagunek deitu zioten poliziari, Errenteriako erdiguneko etxebizitza bateko balkoi batean eskuak odolez zikinduta zituen gizon bat zegoela esanez. Ertzaintza bertaratu eta besoetan hainbat zauri zituen gizona aurkitu zuten, eta anbulantzia eskatu zuten hura artatzeko. Gizonak etxean bakarrik zegoela esan zien ertzainei, baina etxean begiratuko zutela esanda, gela batean emakume bat zegoela aitortu zuen.
Ertzaintzak azaldu zuenez, emakumea itxita zegoen gela barruan, eta ertzainak identifikatu zirenean zabaldu zuen gelako atea oso urduri. Emakumeak kontatu zien erasotzaileak sexu harremanak izatea proposatu ziola eta berak ezetz esan ziola. Besotik heldu eta ukituak egiten hasi zitzaion orduan, eta emakumeak ihes egitea lortu eta gelan sartu zen. Handik gutxira, kolpea entzun zuen emakumeak, baita kristal apurtuen soinua.
Erasotzailea atxilo eraman zuen Ertzaintzak Donostia ospitalera, eta bertan ingresatuta dago leihoa apurtzerakoan bere buruari egindako zauriak osatzeko.
