"Ez gara kikilduko, gero eta indartsuago gara"
Hamarnaka lagun bildu dira Oreretako Mugimendu Feministak gaur arratsaldean deitu duen elkarretaratzera, Errenteria-Oreretan izan den azken eraso sexista salatzera.
Azken eraso sexista salatu dute gaur Oreretako Mugimendu Feministak deituta. Hamarnaka lagun bildu dira Oreretako Mugimendu Feministak gaur arratsaldean deitu duen elkarretaratzera. Nazkatuta eta amorruak gainezka egin dute protesta, baina baita gero eta indartsuagoak diren konbentzimenduarekin. Hala esan du mugimendu feministak, Errenteria-Oreretan izandako azken eraso sexista salatzeko unean, “kolektiboki erantzun duina ematen ari gara beste eraso matxista bati. Beste behin tipo batek ez zuen ulertu nahi izan ez ezetz dela”.
Ematen diren eraso asko eta asko, berez konfiantzazko espazioak beharko luketenetan ematen direla nabarmendu dute, eta horren harira, ikusezina ikusgarri egitera deitu dute: “Biolentzia ugari hurbil gertatzen zaizkigu eta askotan horrek eraso bat erasoa dela ikustea zailtzen digu. Begira diezaiogun ikusten ez denari, bikote harremanei, lagun inguruari, familiartekoari, militantzia sareei, maitasun erromantikoaren mamutzarraren izarapean eraikitzen diren harremanei, gizonen nagusitasuna iraunarazten dutenei emakumeok sotilki baztertzen gaituztenak”.
Autodefentsarako hautua. Hori gakoa indarkeria matxistari aurre egiteko. Biktimak ez direla diote, ezta subjektu pasiboak ere eta berriz ere kexu azaldu dira instituzioetatik bultzatzen diren neurri asistentzialekin, “ez direlako nahikoak”. Kontziente dira, gainera, bide luzea dutela aurretik emakumeek sufritzen duten sexu indarkeria errotik ezabatzeko eta polizia eta epaile neurri zigortzaileez gain, bestelako jarrera, ekintza eta neurri beharko dituztela. Prebentzioa eta batez ere, ezarritako ordenua iraultzea ezinbestekoa dela diote arazoaren muina identifikatu eta aurrera egiteko.
Kalea ere emakumeena dela aldarrikatu dute eta auzo eta herrietan libre ibiltzeko eskubidea dutela, “egunez eta gauez ere, espazio guztiak hartu nahi ditugu emakumeok eraldaketa bidean, plazak, kaleak, udalak, komunak, antzokiak, tabernak, espazio eta bide guztietan libre izan, parrandan lasai ibili”.
Ez dira kikilduko, ezta isilik geratuko ere erasoen aurrean, hala berretsi dute gaurko elkarretaratzean, “erasotzaileak izen abizenekin ezagutu, gure kaleetatik baztertu eta kanporatu arte ez dugu etsiko. Eraso sexisten aurrean altxatu egingo gara, kontzientziak astintzeko, esnatzeko, kaleak bete eta ozen esateko nahikoa dela, nazkatuta gaudela, babosoak kanporatu nahi ditugula”.
Gora borroka feminista oihu eginez eta txalo artean bukatu dute elkarretaratzea.
