Oiartzun Irratiak hogeigarren urteurrena ospatuko du hilaren 13an
Egun osoko egitaraua prestatu dute datorren asteko larunbaterako. Herritarrentzako bazkaria egingo dute, eta Kastron jarri dituzte salgai.
Irati Odriozola eta Alazne Etxeberria esatariak eta Joxemi Lopez irratiko presidentea. Datorren larunbatean, hilak 6, beteko dira hogei urte Oiartzun Irratiak zero programa egin zuenetik. Urteurren biribila ospatzeko, egun osoko festa antolatu dute Oiartzun Irratikoek, herriko elkarteen zein udalaren laguntzarekin. Hilaren 13an izango da hori.
Ekitaldietako bat herri bazkaria izango da, eta bertara joan nahi dutenek, Kastro tabernan eros ditzakete txartelak. Irratiaren egoitzatik ere pasa daitezke. Helduentzako hamabi euro kostatuko dute, eta haurrentzako, berriz, bost.
Oiartzun Irratiaren komunitateko kideentzako zein gainontzeko oiartzuarrentzako izango da bazkaria. Plazara hurbildu ezin dutenek, irratiz entzun ahal izango dute, plazatik bertatik zuzenean emisioa emango baitutelako. Egun osoko egitaraua, berriz, honakoa izango da:
- 10:00etan: Oidultz dultzainero taldearen goiz eresia, Elizalde auzoko kaleetan zehar.
- 11:00etan: Haurren txokoa Kontzejupe plazan, puzgarriekin, aurpegi margotzearekin eta abarrekin.
- 12:00etan: Herri kirol desafioa Done Eztebe plazan: Oiartzungo beteranoak gazteen kontra.
- 13:30ean: Ekitaldia, plazan.
- 14:00etan: Herri bazkaria, plazan.
- Bazkaldu ondoren: herriko bertsolariak, kantaldia eta bingo jolasa.
- 17:30ean: Tio Teronen Semeak.
- 22:00etan: Lartaun abesbatzaren kontzertua, Hipatiaren lorategian.
Bestalde, Oarso Bidasoko Hitzak XX. urteurrenari buruzko erreportajea argitaratuko du ostiralean.
