Arditurri Eguna uztailaren 14an ospatuko dute
Zortzigarren aldiz ospatuko dute Arditurri Eguna, eta egunerako prestatutako ekitaldiez gain, meategiak prezio murriztuan bisitatu ahal izango dira.
Aurten ere bultzagailuekin nola ibili erakutsiko dute. Uztaila erdialdea hurbiltzen den aldiro bezala, Arditurri Egunaren berri ematen dute parketxekoek. Aurtengoa zortzigarren ekitaldia izango da, eta uztailaren 14an egingo dute. Gipuzkoako Parketxe Sareak eta Oiartzungo Udalak elkarrekin antolatu dute.
Goiz osorako ekitaldiak antolatu dituzte. Horrela, 10:30etik 14:00etara, talo tailerra egongo dute Abaraxka lodutekako kideen eskutik. Egin ondoren, gazta edo txokolatea gehitzeko aukera egongo da.
Ordu berean hasita, Suhar arkeologia taldeak historiaurreko bizimodua esperimentatzeko aukera emango du, hainbat teknika erakutsita. Sua egurraren bidez egiteko teknikak, historiaurreko labarretako artea, ehizarako bultzagailu bidezko gezi jaurtiketa eta suharrizko tresneriaren lanketa nolakoak ziren irakatsiko dute.
Hegaztiak eta mineralak
11:00etan, berriz, Igeldoko Arrano Etxean sendatutako hainbat hegazti askatuko dituzte. Zentro horretan, zauritutako edo gaixotutako animaliak sendatzen dituzte eta ahalik eta lasterren beren ingurune naturalera itzultzea da beren helburua. Horretarako, bost minutuko ibilaldi txiki bat egingo dute, toki egoki batetik askatzeko.
12:00etan, mineralen bila abiatuko dira, Luberri interpretazio zentroko geologoek gidatuta. Meategian ustiatu ziren mineralak zeintzuk ziren jakingo dute, eta nola bereizten zituzten ikasi.
Prezio murriztua
Uztailaren 14rako propio prestatutako ekitaldi berezi horiez gain, meategiak bisitatzeko aukera egongo da, prezio murriztu batean. Oinarrizko bistak bi euroko prezioa izango du, eta sakonak, berriz, euro bat gehiagokoa.
Ez da aurrez erreserba egin beharko. Hori bai, sarrerak hartu beharko dira, egunean bertan, toki mugatua egongo delako.
