Frantxixka Iragorriri gaur emango diote azken agurra
99 urterekin hil zen. Euskaltzalea eta abertzalea, Oiartzuarren Baitan proiektuan bere bizitzaren hainbat pasarte kontatu zituen.
Frantxixka Iragorri, Oiartzuarren Baitan eman zuen testigantzaren pasarte batean.
Frantxixka Iragorri Iriarteri gaur arratsaldean emango diote azkeneko agurra. Asteazkenean hil zen, 99 urterekin.
1920ko urtarrilaren 1ean jaio zen, Garmendi baserrian, hamabost senideetan bederatzigarrena. Gaztetxo zela gerra eta gerraondoa bizitu zituen, eta Oiartzuarren Baitan proiektuan jasota utzi zituen bere testigantzak (hemen entzun daitezke). Euskaltzalea eta abertzalea izan zen, baita kristau fededuna ere.
Gazte Izanak jubilatuen elkartearen lehenengo presidentea izan zen, eta, orain arte, kargu hori izan duen emakume bakarra. Bost seme-alaba izan ditu, 11 biloba eta hogei birbiloba.
Hileta elizkizuna Done Eztebe parrokian izango da, 19:00etan hasita.
